‘विकासका लागि सबै जिम्मेवार बन्नुपर्छ’

काठमाडौँ, पुस १५ गते । मुलुकको विकास र समृद्धिका लागि राजनीतिक दललगायत सबै जिम्मेवार बन्नुपर्नेमा सरोकार भएकाहरूले जोड दिएका छन् ।

सामुदायिक रेडियो प्रसारक सङ्घ (अकोराब) नेपालले आज काठमाडौँमा आयोजना गरेको ‘समन्वय र सहमतिका लागि सरोकार भएकाहरूबीच’ संवाद विषयक अन्तक्र्रियामा विकासका मुद्दामा सबै जिम्मेवार हुनुपर्नेमा जोड दिइएको हो ।

पूर्वसांसद तथा नेपाली कम्युनिष्ट पार्टीका नेता अञ्जना बिसंखेले पुराना राजनीतिक दलहरू थप जिम्मेवार नबने निर्वाचनपछिको अवस्था झन जटिल बन्न सक्ने धारणा राख्नुभयो ।

विश्लेषक डा इन्द्रा अधिकारीले राजनीतिक क्षेत्रमा अपेक्षित परिवर्तन नआएको उल्लेख गर्दै जेनजी पुस्ता र अघिल्लो पुस्ताको सोचमा फरक रहेको बताउनुभयो ।

उहाँले सत्तामा रहेका व्यक्तिका सन्तानले सहज रूपमा सेवा–सुविधा पाउने तर आम युवाले नपाउने अवस्थाले असन्तोष बढाएको धारणा राख्नुभयो ।अनुसन्धानकर्ता रीता साहले सत्तामा रहेका व्यक्तिले सत्ता जोगाउन जनभावनासँग खेल्ने गरेको उल्लेख गर्दै वर्तमान सरकारले पनि युवालाई स्वीकार्न नसकेको धारणा राख्नुभयो । उहाँले चुनाव नजिकिँदै गर्दा बन्ने गठबन्धन पितृसत्तात्मक रहेको र त्यसमा महिलाको सहभागिता न्यून भएको भन्दै विरोध जनाउनुभयो । 

गैरसरकारी संस्था महासङ्घका महासचिव देवी खड्काले सामाजिक सद्भाव कायम गर्न अपरिहार्य रहेको बताउनुभयो । उहाँले राज्यसत्तामा रहेका व्यक्तिहरूले युवाको सोचअनुसार अघि बढ्नुपर्ने आवश्यकता औँल्याउँदै निर्वाचन आचारसंहिता र यसका मूल्य–मान्यता नागरिकसम्म पु¥याउनुपर्नेमा जोड दिनुभयो ।

कार्यक्रममा सहभागी अन्य वक्ताहरूले सुशासन, भ्रष्टाचारविरुद्ध आवाज उठाउन भएको जेनजीको आन्दोलन नसकिएको भन्दै जेनजीसँग भएका सम्झौतालाई दलहरूले पनि स्वीकार गर्नुपर्ने धारणा राखेका थिए । रासस