ठाकुरप्रसाद आचार्य
म्याग्दी, मङ्सिर २५ गते । म्याग्दीको बेनीमा ११ औं जिल्लास्तरीय राष्ट्रपति रनिङ शिल्ड खेलकुद प्रतियोगिता सुरु भएको छ । जिल्ला खेलकुद विकास समिति म्याग्दीको आयोजनामा बिहिबार देखि बेनीको खुल्ला मञ्चमा प्रतियोगिता सुरु भएको हो ।
प्रतियोगितामा ६ वटा स्थानीय तहबाट छनोट भएका चारसय भन्दा बढी खेलाडीहरुले सहभागिता जनाएका छन् ।
प्रतियोगिताको ऊर्जा, जलस्रोत तथा सिँचाइ पूर्व राज्यमन्त्री खमबहादुर गर्बुजा (खम्बिर)ले उद्घाटन गर्नुभएको हो । उहाँले खेलकुदले विद्यार्थीको मानसिक र शारिरिक रुपमा स्वस्थ बनाउनुका साथै अनुशासित बनाउन सहयोग पुग्ने बताउनुभयो । प्रतियोगिताले विद्यालय स्तरमा खेलकुद प्रतिभाको पहिचान र विकासमा टेवा पुर्याउने उहाँको विश्वास थियो ।
कार्यक्रममा जिल्ला समन्वय समितिका कार्यवाहक प्रमुख डिलकुमारी खत्री, बेनी नगर प्रमुख सुरत केसी र नेपाल पत्रकार महासंघ म्याग्दी शाखाका अध्यक्ष हरिकृष्ण गौतमले खेल प्रतिभाको उजागर गर्न प्रतियोगिताले टेवा मिल्ने बताउनुभयो । बेनीको एउटा मात्र खेलमैदानलाई व्यवस्थित बनाउन संघ र प्रदेश सरकारले आवश्यक बजेट विनियोजन गर्नुपर्ने उहाँहरुको भनाइ थियो ।
दुई दिनसम्म सञ्चालन हुने प्रतियोगितामा सहभागी खेलाडीले ४२ स्वर्ण पदकका लागि प्रतिस्पर्धा गर्नेछन् । प्रतियोगितामा भलिबल, कबड्डी र एथलेटिक्स विद्यातर्फ जिल्लाका ६ स्थानीय तहबाट व्यवस्थापकीय टिमसहित चारसय ५० जना खेलाडी सहभागी भएको जिल्ला खेलकुद विकास समितिका अध्यक्ष सुमन श्रेष्ठले बताउनुभयो ।
प्रतियोगितामा प्रथम, द्वितीय र तृतीय हुने स्थानीय तहलाई रनिङ शिल्ड, ट्रफी, पदक र प्रमाणपत्र प्रदान गरिने जिल्ला खेलकुद विकास समितिले जनाएको छ । प्रतियोगिताबाट गण्डकी प्रदेशस्तरीय राष्ट्रपति रनिङ प्रतियोगितामा भाग लिनका लागि ९८ जना खेलाडी छनौंट हुने जिल्ला खेलकुद विकास समितिले जनाएको छ ।
-original-thumb.jpg){kind=logo}
