शिवा तामाङ
काठमाडौँ, मङ्सिर १७ गते । ललितपुर महानगरपालिकाका प्रमुख चिरीबाबु महर्जनले अपाङ्गता भएका व्यक्तिहरूमा भएको कलात्मक प्रतिभाका लागि मञ्च दिनुपर्ने बताउनुभएको छ ।
ललितपुर महानगरले बुधबार ३४ औं अन्तर्राष्ट्रिय अपाङ्गता दिवसको अवसरमा आयोजित सांस्कृतिक कार्यक्रमलाई सम्बाेधन गर्दै उहाँले सो कुरा बताउनुभएको हो ।
उहाँले हरेक व्यक्तिमा लुकेको प्रतिभा हुन्छ, सो प्रतिभालाई फक्रने अवसर अभिभावक, शिक्षक तथा स्थानीय तहले योजना र लगानीसहित भौतिक तथा सांस्कृतिक वातावरण तयार गर्दै जानुपर्नेमा जोड दिनुभयो ।
ललितपुर महानगर प्रमुख महर्जनले ललितपुरका अपाङ्गता भएका व्यक्तिहरूको सुविधाका लागि नयाँ बनेका र पुराना संरचनाहरु समेत अपाङ्गतामैत्री बनाउँदै गएको र यातायातको सुविधा, अपाङ्गता भएका व्यक्तिको आर्थिक सशक्तीकरणका लागि गायन, वाद्यवादन, नृत्य र चित्रकला लगायतका कलात्मक प्रतिभा प्रस्फुटनको अवसरलाई प्राथमिकतामा राखेर सहयोग गरिरहेको बताउनुभयो ।
सो अवसरमा ललिपुर महानगरसँगको सहकार्यमा आकार फाउन्डेसनले चित्रकला प्रदर्शनीको आयोजना गरेको थियो । कलाकार कैलाश श्रेष्ठको क्युरेटिङमा आयोजित चित्रकला प्रदर्शनीमा विभिन्न प्रकारका अपाङ्गता भएका बाल कलाकारहरू साइश्री क्षेत्री, कृत अमात्य, रोजन थापा, उत्तम महर्जन, ग्रीनेश तामाङ, मौलिक भण्डारी, प्रनवराज जोशी, सुन्दर श्रेष्ठ, शिला महर्जन, लनी तामाङलगायतका चित्रकलाको प्रदर्शनी गरिएको थियो ।
कला प्रशिक्षक एवं क्युरेटर कैलाश श्रेष्ठले अटिजमलगायत विविध अपाङ्गता भएका बालबालिकामा चित्रकलामा केन्द्रीत हुने, रङ्गसँग खेल्ने, चित्रकलामा आफ्ना भावना व्यक्त गर्न पाउँदा आनन्द मानेर चित्रकला सिर्जना गर्ने क्षमता हुने अनुभव गरेको बताउनुभयो ।
आकार फाउन्डेसन नेपालका संस्थापक अर्चना शाहले अपाङ्गता भएका बालबालिकामा रहेको सिर्जनात्मक क्षमता बढाउने र आर्थिक सशक्तीकरणसँग जोडिने अवसरका लागि फाउन्डेसनले काम गरिरहेको बताउनुभयो । कार्यक्रममा विविध अपाङ्गता भएका बालबालिका, किशोर, किशोरीले नृत्य, बाँसुरी, गायनको प्रस्तुति गरेका थिए ।
