अर्जुन काफ्ले
स्याङ्जा, मङसिर १७ गते । अर्जुन चौपारी गाउँपालिकाले दरौखोला तथा गडयौली खोलामा माछाका भुरा छाडेको छ । यहाँको गड्यौली खोलामा १५ हजार र दरौखोलामा ६० हजार गरेर ७५ हजार विभिन्न जातका माछाका भुरा छाडिएका हुन् ।
गाउँपालिकाले कालीगण्डकी मत्स्य ह्याचरीसँग सहकार्य गरेर गाउँपालिका उपाध्यक्ष सपना गुरुङको नेतृत्वको छोलीले गर्दी, हाडे, ढेड, सहर जातका माछा खोलामा छाडेको हो । पालिकाका प्रमुख प्रशासकीय अधिकृत युवराज अर्यालले पारिस्थितिक प्रणाली बचोस् र भोलिका दिनमा माछा मारेरै जीवन निर्वाह गरेका यहाँका नागरिकले जीविकोपार्जन गर्न सकुन् भन्ने उद्देश्यले खोलामा माछाको भुरा हालेको बताउनुभयो ।
माछाका भुरा छाड्नाले आर्थिक आर्जन सहज हुने बताउँदै अर्यालले हरेक बर्ष माछाका भुरा छाडिनेगरेको बताउनुभयो । पालिकाले खोलामा माछाका भुरा छाडेसँगै माछा मार्न अर्को सूचना नगरेसम्मका लागि रोक लगाएको छ ।
पालिकाले खोलामा माछा भुरा छाड्ने केही समयमा खोलामा जालीबाट मार्नेलाई तीनसय र बल्छी हाल्नेलाई एकसय लिएर आयआर्जन गर्दैआएको छ ।
