जकार्ता, मङ्सिर १३ गते । इन्डोनेसियाको सुमात्रा टापुमा मङ्गलबार भएको मनसुनी वर्षाका कारण आएको बाढी र पहिरोमा परी ज्यान गुमाउनेको सङ्ख्या १६४ पुग्नुका साथै ७९ जना बेपत्ता मानिसको खोजी जारी रहेको जनाइएको छ ।
बाढीले सडकमा क्षति पुगेको उल्लेख गर्दै आवश्यक उपकरणको अभावका कारण उद्धारकर्मीले कठिनाइको सामना गरिरहेको इन्डोनेसियाका अधिकारीले विज्ञप्तिमार्फत जनाएका छन् । इन्डोनेसियाको राष्ट्रिय विपद व्यवस्थापन एजेन्सी (बिएनपिबी)ले सुरुमा १७४ जनाको मृत्यु भएको रिपोर्ट गरेकोमा हाल मृतकको सङ्ख्या १६४ मा संशोधन गरेको छ ।
एजेन्सीका प्रमुख सुहारियान्तोले पत्रकार सम्मेलनमा उत्तरी सुमात्रा प्रान्तमा मृतकको सङ्ख्या ११६ पुगेको र उद्धारकर्ताले टापुको पश्चिममा २३ जनाको शव बरामद गरेको जानकारी दिनु भएको छ । उहाँले उद्धार टोलीले उत्तरी सुमात्राका १२ सहर र जिल्लामा प्रभावित क्षेत्रमा पुग्न कठिनाइको सामना गरिरहेको पुष्टि गर्दै बाढीले १७ हजार भन्दा बढी घर डुबानमा पर्दा लगभग २३ हजार मानिस विस्थापित भएको जनाउनु भएको छ ।
उष्णकटिबन्धीय चक्रवात सिनियार्टले बढाएको मनसुनी वर्षाले मङ्गलबार उत्तरी सुमात्राका नदीले खतराको सतह नागेका थिए भने बाढीले धेरै पाहाडी गाउँ बगाएको छ । बाढीका कारण तीन हजार २०० भन्दा बढी सरकारी घर तथा भवन डुबानमा परेपछि लगभग उक्त स्थानमा आश्रय लिइरहेका तीन हजार परिवारसमेत विस्थापित भएको जनाइएको छ । बाढीले धानबाली, गाईबस्तु र सार्वजनिक सुविधा पनि नष्ट गरेपछि मानिसको दिन चर्या नै तहसनहस बनाएको जनाइएको छ । रासस/क्यूएनए
