प्रेमराज सिम्खडा
कालीकोट, मङ्सिर १३ गते । कालीकोटमा सञ्चालित सामुदायिक रेडियो तिला आवाजका स्टेसन म्यानेजर वीरेन्द्र आचार्यको सवारी दुर्घटनामा निधन भएपछि शुभकालिका गाउँपालिका–६, हाउडीगाउँ शोकाकुल बनेको छ ।
स्थानीय पुष्पराज आचार्यका अनुसार अपत्यारिलो घटनाले स्थानीय स्तब्ध भएका छन् । गाउँमा वृद्धदेखि बालकसम्म दुःखी भएको उहाँले बताउनुभयो । निवर्तमान वडाध्यक्ष कर्णबहादुर केसी न्यायको पक्षमा सधैँ आवाज उठाउने आचार्यको निधनले गाउँवासीलाई ठुलो क्षति भएको बताउनुभयो ।
बुवा रत्नप्रसाद आचार्य र आमा जसुदा आचार्यका माइला छोरा रहनुभएका वीरेन्द्र सुरुमा व्यावसायमा आबद्ध हुनुहुन्थ्यो । सदरमुकाम मान्म बस्दै व्यवसाय गर्दै आएका आचार्य अन्याय सहन नसक्ने स्वभावका भएकाले पत्रकारिता पेसामा लागेको बताउने गर्नु भएको थियो ।
सान्नीत्रिवेणी गाउँपालिकाले सञ्चालन गरेको रेडियो सान्नीत्रिवेणी एफएमको स्टेसन म्यानेजर भएर काम गरेका आचार्य पछि आफ्नै लगानीमा रेडियो तिला आवाज सञ्चालन गर्नुभएको थियो ।
दुई छोरा, एक छोरी, श्रीमती आमा बुवासँगै बस्दै आउनुभएका पत्रकार आचार्य निडर पत्रकारको पहिचान बनाउनुभएको स्थानीयको बुझाइ छ । वीरेन्द्रनगर नगरपालिकाको वडा २ कार्यालय अगाडि आचार्य सवार स्कुटीलाई शुक्रबार राति एक मोटरसाइकलले ठक्कर दिँदा उहाँको ज्यान गएको थियो ।
सुर्खेतका प्रहरी प्रमुख एसपी सुधिरराज शाहीले दुर्घटनालाई लिएर सडकमा मृतकका आफन्तले आन्दोलन गरिरहेको बताउनुभयो । दुर्घटना स्थल हेर्दा विपरित दिशाबाट आएकाले ठक्कर दिएको देखिएको उहाँको भनाइ छ । घटना सङ्कास्पद भएको भन्दै आफन्तले सुर्खेतको यरिचोक, मुलपानीचोक लगायत ठाउँमा टायर बालेर आन्दोलन गरेका छन् ।
