चित्रकुमार मिजार
सिन्धुपाल्चोक, मङ्सिर १३ गते । बाह्रबिसे नगरपालिका–४ स्थित श्री शारदा माध्यमिक विद्यालयको एसएलसी ब्याच २०६१ समूहले आफ्नो पूर्व विद्यालयमा अध्ययनरत अभिभावकविहीन, बाढीपहिरोले घरवास गुमाएका, गरिब, विपन्न, जेहेन्दार विद्यार्थीलाई नगद छात्रवृत्ति प्रदान गरेको छ ।
उक्त ब्याचले शुक्रबार विद्यालयमै पुगेर आठ जना छात्रछात्रालाई नगद सहयोग गरेको सो ब्याचका अध्यक्ष सन्तोष बोहराले जानकारी दिनुभयो । बिगत १० वर्षदेखि बर्सेनि ५० भन्दा बढी विपन्न विद्यार्थीलाई छात्रवृत्ति, शैक्षिक सामग्री सहयोग गर्दै विभिन्न रचनात्मक र अतिरिक्त क्रियाकलाप गर्दैआएको उहाँले बताउनुभयो ।
सो ब्याजका विद्यार्थीले खाजा, फजुल खर्च कटाएर आफ्नो विद्यालयका विपन्न विद्यार्थीलाई नगद छात्रवृत्ति लगायतको सहयोगले विपन्न छात्रछात्राहरू शैक्षिक क्रियाकलापमा उत्साहित भएको प्रधानाध्यपक निलप्रसाद सुवेदीले बताउनुभयो । आगामी वर्षहरूमा पनि सो कार्य निरन्तर सञ्चालन गरिने बोहराको भनाइ छ ।
छात्रवृत्ति पाएपछि पढाईमा थप हौसल्ला मिलेको कक्षा ७ मा अध्ययनरत रेश्मा तामाङले बताउनुभयो । सो विद्यार्थी समूहमा आबद्धहरूले व्यक्तिगत र सामूहिक रूपमा आर्थिक सहयोग सङ्कलन गरेर क्यान्सर रोगबाट ग्रसित बाह्रबिसेकी अमृता भण्डारी, बाह्रबिसेकै अर्का फोक्सो क्यान्सर पीडित नारायण श्रेष्ठ लगायतको गम्भीर रोग उपचार अभावमा रहेका बिरामीलाई नगद सहयोग गर्दैआएको उक्त समूहका नवीन श्रेष्ठले बताउनुभयो ।
