जीवछ यादव
लहान, मङ्सिर १३ गते । लहान नगरपालिका र सगरमाथा चौधरी आँखा अस्पताल लहानको सहयोगमा लहान नगरपालिकामा विगत तीन वर्षदेखि चलिरहेको निःशुल्क शिविरबाट विपन्न समुदाय लाभान्वित भएका छन् ।
लहान नगरपालिकाको २४ वटै वडामा तीन वर्षमा १७ हजार ३६४ बिरामीको आँखा जाँच गरिएको छ । त्यसमध्ये एक हजार ९०५ बिरामीको मोतियाविन्दुको शल्यक्रिया गरिएको छ । सात हजार बिरामीलाई औषधी र तीन हजारलाई चश्मा दिइएको शिविर प्रमुख राजकुमार यादवले बताउनुभयो ।
लहान नगरपालिकामा रहेको विपन्न समुदायहरूको निःशुल्क आँखा जाँच र शल्यक्रियाका लागि लहान नगरपालिकाले २५ लाख खर्च गरेको नगर प्रमुख चौधरीले बताउनुभयो । आफ्नो कार्यकालमा लहान नगरपालिकामा आँखा रोगबाट पीडित कुनै पनि विपन्न समुदाय नरहने उहाँले दाबी गर्नुभयो ।
लहान नगरपालिका लगायत सिराहा सप्तरीका १७ वटा पालिकाहरूमा चलिरहेको निःशुल्क आँखा शिविरबाट हजारौ बिरामीहरूले उपचार पाएको सगरमाथा चौधरी आँखा अस्पतालका अध्यक्ष रविन्द्रलाल चौधरीले बताउनुभयो । लहान नगरपालिकाले थालेको यो प्रेरणादायी अभियान मधेश प्रदेशका अन्य पालिकामा समेत विस्तार भइरहेकको बताउनुभयो ।
दृष्टि नहुनेहरूका लागि सृष्टि नै नभएको बेला लहान नगरपालिकाले निःशुल्क आँखा शिविर आयोजना गरेर राहत दिएको लहान नगरपालिका २० का हरिदेव सदायले खुसी व्यक्त गर्नुभयो । ४० वर्ष उमेरभन्दा माथिका ९० प्रतिशतभन्दा बढी विपन्न समुदाय निःशुल्क शिविरबाट लाभान्वित भएको अस्पतालको तथ्याङकमा उल्लेख छ । मोतियाविन्दुको शल्यक्रिया गराउन पाँच हजारदेखि १० हजार लाग्ने खर्च लाग्ने गर्दछ ।
