काठमाडौँ, मङ्सिर १३ गते । नेपाल चेम्बर अफ कमर्शको ७५औँ हीरक जयन्तीका अवसरमा आज जमलदेखि वसन्तपुरसम्म पदयात्रा निकालिएको छ ।
पदयात्रापछि आयोजित कार्यक्रमलाई सम्बोधन गर्दै नेपाल चेम्बर अफ कमर्शका अध्यक्ष कमलेशकुमार अग्रवालले चेम्बरले मुलुकको आर्थिक विकासमा निजी क्षेत्रको योगदान उल्लेखनीय रहेको उल्लेख गर्दै निजी क्षेत्रलाई अझ सशक्त बनाउन जरुरी रहेकोमा जोड दिनुभयो । उहाँले भन्नुभयो, “हीरक जयन्तीले संस्थाको इतिहास, योगदान र भविष्यको दिशालाई स्पष्ट पारेको छ । निजी क्षेत्र समृद्ध अर्थतन्त्रको प्रमुख आधार हो ।”
नेपाल चेम्बर अफ कमर्स, शिक्षा तथा खेलकुद समिति सभापति रूपक राजवंशीले शिक्षा, खेलकुद र उद्यमशीलतालाई जोड्दै युवालाई अवसर प्रदान गर्ने कार्यक्रमलाई चेम्बरले निरन्तर अघि बढाइरहेको बताउनुभयो ।
हीरक जयन्ती उत्सव मूल समारोह समिति सभापति राजेशकाजी श्रेष्ठले चेम्बरको ७५औँ वर्षको यात्रा गौरवपूर्ण रहेको उल्लेख गर्दै आगामी दिनमा अझ प्रभावकारी ढङ्गले काम गर्ने प्रतिबद्धता व्यक्त गर्नुभयो । पदयात्रामा चेम्बरका पदाधिकारी, उद्योगी-व्यवसायी तथा विभिन्न क्षेत्रका प्रतिनिधिको सहभागिता थियो । पदयात्रा जमलदेखि सुरु भई वसन्तपुर दरबार क्षेत्रमा पुगेर समापन गरिएको थियो । रासस
