जनार्जन खत्री
सर्लाही, कात्तिक ३० गते । सर्लाहीको दुई फरक स्थानमा आइतबार भएको सवारी दुर्घटनाका घाइतेलाई थप उपचारका लागि बेग्लाबेग्लै हेलिकप्टरमार्फत काठमाडौँ लगिएको छ ।
जिल्लाको ब्रह्मपुरी र चन्द्रनगर गाउँपालिकामा भएका छुट्टाछुट्टै सवारी दुर्घटनाका घाइतेलाई बयलवासमा सामान्य उपचारपश्चात थप उपचारका लागि हेलिकप्टर मगाएर काठमाडौं लगिएको हो ।
प्रहरीका अनुसार ब्रह्मपुरी गाउँपालिका–२, धर्मपुर टोलमा ना ४१ प ३३०९ नम्वरको मोटरसाइकल आफै अनियन्त्रित भएर दुर्घटना हुँदा ईश्वरपुर नगरपालिका–७, बयलवास बस्ने २० वर्षीय उमर मिकरानी घाइते हुनुभएको छ ।
मिकरानी आफ्नै दाई २५ वर्षीय होजइफा मिकरानीले चलाएको मोटरसाइकलको पछाडि बस्दा दुर्घटना भइ टाउको र शरीरका विभिन्न भागमा चोट लागेर घाइते हुनुभएको प्रहरीले जनाएको छ ।
यस्तै चन्द्रनगर गाउँपालिका–२, बिर्ता बजारमा प्रदेश २–०२–००१ त २२४१ नम्वरको ट्याक्टर र प्रदेश २–०३–०१३ प १९९७ नम्वरको मोटरसाइकल ठोक्किँदा मोटरसाइकल चालक चन्द्रनगर गाउँपालिका–३, बडकुर्वा बस्ने २८ वर्षीय अक्षयकुमार सिंह कुशवाहा घाइते हुनुभएको छ ।
कुशवाहको बायाँ तीघ्रामा चोट लागेको प्रहरीले जनाएको छ ।
ब्रह्मपुरी दुर्घटनाका घाइते मिकरानीलाई अमृत हेल्थ केयर बयलवास र चन्द्रनगर दुर्घटनाका घाइते कुशवाहालाई गोदावरी हेल्थ केयर बयलवासमा सामान्य उपचारपश्चात परिवारले बेग्लाबेग्लै हेलिकप्टर मगाएर थप उपचारका लागि काठमाडौंतर्फ लगेका इलाका प्रहरी कार्यालय केशरगन्ज, बयलवासका प्रहरी निरीक्षक नितेशकुमार सिंहले जानकारी दिनुभयो ।
इन्स्पेक्टर सिंहका अनुसार चन्द्रनगरको दुर्घटनामा संलग्न ट्याक्टर पक्राउ गरिएको छ भने चालक फरार रहेका छन् ।
-original-thumb.jpg)
