बेइजिङ, कात्तिक २८ गते । चिनियाँ राष्ट्रपति सी जिनपिङ र थाइल्यान्डका राजा महा भाजिरालोङकोर्नले शुक्रबार ऐतिहासिक भ्रमणका क्रममा आफ्नो देशबिच घनिष्ठ सम्बन्धको दृढ प्रतिबद्धता व्यक्त गर्नु भएको छ ।
यो भ्रमण थाई राजाको चीन भ्रमणको पहिलो पटक हो र दुवै देशबिच कूटनीतिक सम्बन्ध स्थापना भएको ५०औँ वार्षिकोत्सवको अवसरमा आयोजना गरिएको थियो । सी जिनपिङ र उहाँकी पत्नी पेङ लियुआनले बेइजिङको विशाल ग्रेट हल अफ द पिपुलमा राजा भाजिरालोङकोर्न र उहाँकी पत्नी रानी सुथिडालाई सम्मानपूर्वक अभिवादन गर्नुभयो ।
सरकारी समाचार एजेन्सी सिन्ह्वाका अनुसार राष्ट्रपति सीले चीन र थाइल्यान्डलाई ‘साँच्चै असल आफन्त, असल मित्र र असल साझेदार’ का रूपमा वर्णन गर्नुभयो । सीले थाइल्यान्डबाट कृषि आयात बढाउन र रेलवे विकास, आर्टिफिसियल इन्टेलिजेन्स तथा एरोस्पेसजस्ता क्षेत्रमा सहयोगलाई प्रोत्साहन गर्न बेइजिङ उत्साहित रहेको बताउनुभयो ।
राजा भाजिरालोङकोर्नले चीनसँगको आफ्नो देशको सम्बन्धलाई ‘भातृ सहयोग’ का रूपमा व्याख्या गर्दै विभिन्न क्षेत्रमा आदान-प्रदानलाई अझ गहिरो बनाउने इच्छा व्यक्त गर्नुभयो । भ्रमण कार्यक्रमअनुसार थाई राजपरिवारले बेइजिङस्थित बौद्ध मन्दिर, एयरोस्पेस विकास केन्द्र भ्रमण गर्नुका साथै राजकीय भोजमा भाग लिनुहुनेछ । सन् २०१६ मा सिंहासनमा बस्नुभएका राजा भाजिरालोङकोर्नको यो चीन भ्रमण दोस्रो आधिकारिक विदेश भ्रमण हो ।
यसले चीनसँगको सम्बन्ध अझ न्यानो भएको सङ्केत दिन्छ । थाइल्यान्ड संयुक्त राज्य अमेरिकासँग आधिकारिक सैन्य सहयोगी भए पनि चीनको सबैभन्दा ठूलो व्यापारिक साझेदार र बढ्दो सैन्य उपकरणको स्रोत बनेको छ । हालैका वर्षहरूमा थाइल्यान्डमा चिनियाँ लगानी उल्लेखनीय रूपमा बढेको छ । विशेष गरी धेरै चिनियाँ कम्पनीले अमेरिकी भन्सार शुल्कबाट बच्न दक्षिणपूर्वी एसियामा उत्पादन सारिसकेका छन् ।
बेइजिङसँगको सहकार्य प्रदर्शनका क्रममा यस वर्षको सुरुमा थाई अधिकारीहरूले ४० उइघुर शरणार्थीलाई चीन फिर्ता पठाएका थिए, जसले अमेरिका लगायत अन्तर्राष्ट्रिय आलोचनाको सामना गरेको थियो । यस्तै चिनियाँ कूटनीतिज्ञको अनुरोधमा बैङ्ककमा आयोजना गरिएको प्रदर्शनीमा तिब्बती, उइघुर र हङकङका कलाकारको काम सेन्सर गरिएको थियो ।
थाइल्यान्ड र चीनबिचको रणनीतिक सहकार्यलाई बलियो बनाउन बेइजिङले दक्षिणपूर्वी एसियाली छिमेकीलाई सीमापार साइबर घोटालाविरुद्ध कारबाही गर्न दबाब दिँदै आएको छ । रासस/एपी
