चितवन समाचारदाता
चितवन, जेठ २४ गते । जनक शिक्षा सामग्री केन्द्र प्रादेशिक कार्यालय भरतपुरले यस वर्ष २० करोड रुपियाँभन्दा धेरैको किताब बिक्री गरेको छ । चालु आर्थिक वर्षको साउन महिनादेखि जेठ २२ गतेसम्म २० करोड १४ लाख ३७ हजार ९४ रुपियाँको किताब बिक्री गरेको छ । कार्यालयका प्रमुख धनबहादुर केसीले गत वर्षभन्दा अहिले छिटो पाठ्यपुस्तक आएकाले बिक्री धेरै भएको जानकारी दिनुभयो । प्रमुख केसीले भन्नुभयो, “चैतबाट नै पुस्तक जिल्ला जिल्लामा बिक्री गरेका थियौँ । गोदाममा थोरै मात्र पुस्तक रहेको छ । त्यो पनि असार मसान्तसम्म बिक्री हुन्छ ।”
जनक शिक्षामा सूचीकृत भएको व्यवसायीले पाठ्यपुस्तक लैजाने गरेका छन् । प्रमुख केसीले भन्नुभयो, “शैक्षिक सत्र सुरु नहुँदै सबै विद्यार्थीको हात हातमा पुस्तक पुगेको थियो ।” जनक शिक्षा भरतपुरले गत वर्ष १४ लाख ७६ हजार ३५९ थान पुस्तक बिक्री गरेको थियो । त्यसबाट १८ करोड २० लाख ५५ हजार २२३ रुपियाँ रकम जम्मा भएको थियो । यो वर्ष अधिकतम बिक्री गर्ने कार्यालयले तयारी गरेको छ ।
चालु आवमा १४ लाख ८५ हजार ८१८ थान पुस्तक आएको छ । यीमध्ये गत चैत १७ देखि २०८२ जेठ २२ गतेसम्म १४ लाख ४३ हजार ७२६ थान बिक्री गरेको छ । यसबाट १९ करोड ६७ लाख ५७ हजार १४१ रुपियाँ राजस्व सङ्कलन भएको कार्यालयका सूचना अधिकारी वरिष्ठ सहायक केदारराज विष्टले जानकारी दिनुभयो । कार्यालयमा आएका सबै पुस्तक बिक्री भएमा ३१ करोड १५ लाख ५० हजार ९८७ रुपियाँ राजस्व सङ्कलन हुने कार्यालयले जानकारी दिएको छ । शैक्षिक सत्र सुरु नहुँदै पुस्तक बजारमा पठाउन थालेकाले गत वर्षभन्दा अहिले धेरै बिक्री हुने अपेक्षा गरिएको छ । कार्यालयले किताब, कापी बिक्री गर्दै आएको छ । निजी कम्पनीले भन्दा सस्तोमा किताब र कापी बिव्रmी गरेको छ ।
गत वर्ष कक्षा ३, ४ र ५ को पाठ्यपुस्तक निजी क्षेत्रले पनि बिक्री गरेको थियो । यो वर्ष कक्षा ३ देखि नै जनक शिक्षा सामग्रीले पाठ्यपुस्तक बिक्री गरेको छ । भरतपुरको प्रादेशिक कार्यालयले बारा, पर्सा, रौतहट, मकवानपुर, चितवनसँगै पूर्वी नवलपरासी र तनहुँको पूर्वी क्षेत्रमा समेत पाठ्यपुस्तक बिक्रीवितरण गर्दै आएको छ । चितवनमा दुई करोड बराबरको पुस्तक बिक्री हुँदै आएको छ । जनक शिक्षासँग सूचीकृत भएका व्यवसायी सबैभन्दा बढी चितवनमा छन् । चितवनमा हालसम्म एक सय व्यवसायीले पसल सूचीकृत गरेका छन् । सूचीकृत भएका पसलले मात्र पाठ्यपुस्तक बिक्री गर्न पाउँछन् । स्थानीय तहले विद्यालयको खातामा पैसा हाल्छन् र विद्यालयले नै विद्यार्थी सङ्ख्याका आधारमा पाठ्यपुस्तक खरिद गर्छन् ।
प्रमुख केसीले भन्नुभयो, “सहज रूपमा पाठ्यपुस्तक बिक्री भइरहेका छन्, पुस्तकको मूल्य पनि बढेको छैन । कक्षा ३ को पूरा किताबको सेट किन्दा ५८० रुपियाँ पर्छ भने कक्षा १० को पाँच थान पुस्तक किन्दा ९२४ रुपियाँ पर्छ । गत वर्षकै मूल्यमा जनक शिक्षाले किताब बिक्री गरिरहेको छ ।”
