लोकतन्त्रको विकल्पका रूपमा अन्य कुनै व्यवस्था हुन सक्दैन : मन्त्री पाण्डे

काठमाडौँ, जेठ १४ गते । संस्कृति, पर्यटन तथा नागरिक उड्डयनमन्त्री बद्री पाण्डेले लोकतन्त्रको विकल्पमा अन्य कुनै पनि शासन व्यवस्था नहुने स्पष्ट पार्नुभएको छ ।

बुधबार प्रज्ञा प्रतिष्ठानले गणतन्त्र दिवसको अवसरमा आयोजना गरेको कविता उत्सवमा बोल्नुहुँदै मन्त्री पाण्डेले लोकतान्त्रिक व्यवस्थाका कमजोरीहरू सुधार्दै अगाडि बढ्नुपर्नेमा जोड दिनुभयो ।

उहाँले भन्नुभयो, “लोकतन्त्रको विकल्पमा कुनै पनि राजनीतिक व्यवस्था हुन सक्दैन । लोकतन्त्रमा भएका कमी–कमजोरी सुधार गर्दै जानुपर्छ । प्राप्त उपलब्धीहरू गुमाएर अर्को व्यवस्था ल्याउने कुरा देशलाई फेरि गोलचक्रमा लैजाने प्रयास मात्रै हुन्छ ।”

मन्त्री पाण्डेले सङ्घीय लोकतान्त्रिक गणतान्त्रिक व्यवस्था नै नेपालको स्थायित्व र समृद्धिको आधार भएको उल्लेख गर्दै यसैलाई सवल र प्रभावकारी बनाउनु नै आजको आवश्यकता भएको बताउनुभयो ।

उहाँले तीनवटै तहका सरकारबिच समन्वयमा आधारित कार्यशैली आवश्यक रहेको धारणा राख्दै सबै तहका सरकारले एकअर्कासँग मिलेर राष्ट्र निर्माणमा लाग्नुपर्ने औंल्याउनुभयो ।

मन्त्री पाण्डेले नेपाली कवि, साहित्यकार र लेखकहरू क्रान्तिका प्रत्येक चरणमा जनचेतना जगाउन महत्त्वपूर्ण भूमिका निर्वाह गरेको स्मरण गर्दै गणतन्त्रको पक्षमा कलम चलाउन आग्रह गर्नुभयो ।

साथै, संस्कृति, पर्यटन तथा नागरिक उड्डयन मन्त्रालय सिर्जनात्मक व्यक्तित्वहरूको सम्मान र प्रवर्धनमा सधैँ तयार रहेको उल्लेख गर्दै उहाँले आगामी दिनहरूमा यस्ता कार्यक्रमहरूलाई अझ प्रभावकारी रूपमा अगाडि बढाइने प्रतिबद्धता जनाउनुभयो ।