तेहरान, वैशाख १७ गते । इरान र अमेरिकाले शनिबार रोममा इस्लामिक गणतन्त्रको आणविक कार्यक्रममा चौथो चरणको वार्ता गर्ने इरानका विदेशमन्त्रीले बताउनुभएको छ ।
लामो समयदेखिका प्रतिद्वन्द्वीहरूले कार्यक्रमको विषयमा सम्झौताको लक्ष्य राखेर तीन चरणको वार्ता गरिसकेका छन् । पश्चिमी देशहरूका अनुसार इरानको युरेनियम संवर्धन आणविक हतियार विकास गर्ने उद्देश्यले बनाइएको हो । तेहरानले उक्त आरोपलाई अस्वीकार गर्दछ ।
ओमानको मध्यस्थतामा अप्रिल १२ मा सुरु भएको वार्ता दुई पक्षबिच वर्षौंदेखिको उच्च स्तरको सम्पर्क हो । “वार्ताको अर्को चरण रोममा हुनेछ”, विदेशमन्त्री अब्बास अराघचीले बुधबार मन्त्रिपरिषद्को बैठकपछि भन्नुभयो ।
इरानी अधिकारीहरूले शुक्रबार सन् २०१५ को आणविक सम्झौताका पक्षहरू बेलायत, फ्रान्स र जर्मनीका प्रतिनिधिहरूसँग पनि भेट गर्ने उहाँले जानकारी दिनुभयो ।
यो सम्झौताले इरानको आणविक गतिविधिहरू रोक्ने बदलामा प्रतिबन्धहरू हटाउन आह्वान गरेको थियो । तर सन् २०१८ मा अमेरिकी राष्ट्रपतिका रूपमा डोनाल्ड ट्रम्पको पहिलो कार्यकालमा वासिङ्टन उक्त सम्झौताबाट पछि हटेको थियो ।
फ्रान्सले युरोपेली त्रिगुटले प्रतिबन्धहरू पुनः लागु गर्नसक्ने धम्की दिएपछि इरानको संयुक्त राष्ट्र मिसनले ‘धम्की र आर्थिक ब्ल्याकमेल’ ‘पूर्ण रूपमा अस्वीकार्य’ भएको बताएको छ ।
“वास्तविक कूटनीति धम्की वा दबाबमा अगाडि बढ्न सक्दैन”, इरानको आइएसएनए समाचार एजेन्सीले बुधबार प्रकाशित गरेको पत्रमा कूटनीतिक मिसनले भनेको छ ।
ट्रम्पले मार्चमा इरानका सर्वोच्च नेता आयातोल्लाह अली खामेनीलाई एउटा पत्र पठाएर इरानले अस्वीकार गरेमा सम्भावित सैन्य कारबाहीको चेतावनी दिँदै वार्ता गर्न आग्रह गर्नुभएको थियो ।
जनवरीमा कार्यालयमा फर्केपछि ट्रम्पले आफ्नो पहिलो कार्यकालमा जस्तै ‘अधिकतम दबाब’ प्रतिबन्ध अभियानलाई पुनर्जीवित गर्नुभएको छ । तेहरानले जारी वार्तामा आणविक मुद्दा र प्रतिबन्ध हटाउने कुरामा मात्र ध्यान केन्द्रित गर्नुपर्ने कुरामा जोड दिएको छ ।
शनिबार ओमानको राजधानी मस्कटमा भएको अन्तिम चरणमा दुवै पक्षले प्रगति भएको बताएका थिए । रासस/एएफपी
