अजय शाह
गौशला (महोत्तरी), चैत २४ गते । महोत्तरीमा रामनवमी मनाइँदै छ । आइतबार आराध्यदेव श्रीरामको जन्मोत्सवमा विशेष धार्मिक अनुष्ठानबिच मनाइन लागेको हो । श्रीरामको जन्मदिनका अवसरमा यहाँका मठमन्दिर र देवालयमा विशेष उत्सव आयोजना गरिएका छन् ।
चैत शुक्ल नवमी श्रीरामको जन्म दिन मानिन्छ । श्रीराम त्रेता युगकालीन विदेह अर्थात् मिथिला नरेश शिरध्वज जनकका ज्वाइँ हुँदा सम्पूर्ण मिथिलावासी आपूmलाई उहाँको ससुराली मान्दछन् ।
त्रेता युगमा चैत्र शुक्ल नवमीका दिन अयोध्यामा जन्मनु भएका श्रीरामले दानवीय प्रवृत्तिका रावणको अन्त्य गरी जन कल्याण गरिएको सम्झनामा यो पर्व मनाइने गरिएको लक्ष्मी नारायण मठ मटिहानीको उत्तराधिकारी महन्त पदमा डा. रविन्द्र दास बैष्णव बताउनुभयो ।
रामनवमीको अवसरमा आज बिहानैदेखि महोत्तरीसहित देशभरका राममन्दिरहरुमा पूजाअजा गर्ने श्रद्धालुभक्तजनको घुइँचो लागेको छ ।
रामनवमीको अवसरमा जनकपुरधाममा विशेष मेलाको आयोजना समेत हुने गर्दछ । मेलामा सहभागी हुन नेपाल तथा छिमेक देश भारतबाट हजारौंको सङ्ख्यामा श्रद्धालुहरू जनकपुरधाम आएका छन् ।
आजको दिन देशभरी रामको स्मृतिमा पवित्र नदी, ताल तथा कुण्डहरुमा स्नान ध्यान गरी व्रत बसी रामसीता पाठ, अध्यात्म वाल्मीकि र तुलसीकृत–रामायण वाचन गर्नुका साथै भगवान रामको पूजाआराधना गरी रातभरी भजनकीर्तन र जाग्राम बस्ने परम्परा रहिआएको महन्थ डा. दासले बताउनुभयो ।
अयोध्याका राजा दशरथको ज्येष्ठ पुत्र भई भगवान विष्णुको सातौँ अवतारको रुपमा जन्मेको बताइन्छ । राम मिथिलाका राजा जनकका पुत्री सीतासँग विवाह गरी संसारबाट पापी तथा दुष्ट राक्षसहरुको नाश गर्नुभएको थियो ।
आफ्नो पिताको कठोर आज्ञाको सहजतापूर्वक पालन गरी मानव जातिलाई सत्यको मार्गमा हिँड्न प्रेरणा दिनुभएकाले रामको सम्झनमा रामनवमी पर्व मनाइँदै आएको धार्मिक ग्रन्थहरुमा उल्लेख गरिएको छ । रामनवमीको अवसरमा आज देशभर सार्वजनिक बिदा दिइएको छ ।
