काठमाडौँ, चैत २३ गते । कर्मचारी सञ्चय कोषले गत आर्थिक वर्षमा आर्जन गरेको कुल मुनाफाबाट सञ्चयकर्ता तथा योगदानकर्तालाई करिब पाँच अर्ब ३४ करोड रुपियाँ मुनाफा वितरण गरेको छ ।
सञ्चयकर्ताको खातामा करिब पाँच अर्ब २७ करोड रुपियाँ र योगदानमा आधारित निवृत्तभरण कोषका योगदानकर्ताको खातामा करिब छ करोड ४३ लाख रुपियाँ मुनाफा जम्मा गरिएको कोषले जनाएको छ ।
कोष सञ्चालक समितिको यही चैत १७ गतेको बैठकले आव २०८०÷८१ को वित्तीय विवरण स्वीकृत गर्दै सञ्चयकर्ता तथा योगदानकर्ताको व्यक्तिगत खातामा रहेको सुरु मौज्दात रकममा १.१० प्रतिशतका दरले हुने रकम मुनाफाका रूपमा वितरण गर्ने निर्णय गरेको थियो ।
कोषले प्रत्येक आवमा आर्जन गरेको कुल मुनाफाकोे ९२ प्रतिशत रकम सञ्चयकर्ताका लागि मुनाफा र कल्याणकारी प्रयोजनका लागि वितरण गर्ने गरेको छ । बाँकी रकम विभिन्न जगेडा कोषमा राख्ने गरिएको छ ।
कोषले सञ्चयकर्ता तथा योगदानकर्तालाई चालु आवमा सञ्चित रकममा ५.५० प्रतिशतका दरले ब्याज प्रदान गरिरहेको छ भने सञ्चित रकमको
सुरक्षणमा सञ्चयकर्ता तथा योगदानकर्ताले कोषबाट ५.६० प्रतिशत ब्याजमा सञ्चित रकमको ९० प्रतिशतसम्म विशेष सापटी पाउने गरेका छन् ।
कोषले सञ्चयकर्ता तथा योगदानकर्ताको सेवा कालको आवश्यकता परिपूर्ति गर्ने उद्देश्यले विगतदेखि नै विशेष, घर, शैक्षिक, घर मर्मत, सरल र जग्गा खरिद सापटीसमेत उपलब्ध गराउँदै आएको छ ।
सञ्चयकर्ताले छुट्टै योगदान गर्नु नपर्ने गरी कोषले आफ्नै स्रोतबाट सञ्चयकर्ता दम्पतीलाई स्वास्थ्य उपचार शोधभर्ना सुविधा उपलब्ध गराउँदै आएको छ ।
यस्तै काजकिरिया अनुदान, सुत्केरी तथा शिशु स्याहार सुविधा, दुर्घटना क्षतिपूर्ति अनुदानलगायतका सामाजिक सुविधा प्रदान गर्दै आएको छ ।
यस अन्तर्गत गत आवमा सुत्केरी तथा शिशु स्याहार सुविधा १४ करोड ६५ लाख रुपियाँ, काजकिरिया अनुदान दुई करोड ८२ लाख रुपियाँ, दुर्घटना क्षतिपूर्ति दुई करोड १४ लाख रुपियाँ, स्वास्थ्य उपचार शोधभर्ना ३४ करोड ६५ लाख रुपियाँ र विशेष आर्थिक सुविधाबापत निजामतीतर्फका ४७ सञ्चयकर्तालाई करिब ७० लाख रुपियाँ प्रदान गरिएको कोषले जनाएको छ ।
हाल कोषमा पाँच लाख ७५ हजार सञ्चयकर्ता र ८० हजार चार सय निवृत्तभरण कोषका योगदानकर्ता रहेका छन् ।
