राधाकृष्ण डुम्रे
वालिङ(स्याङ्जा), चैत २१ गते । सञ्चार, सूचना तथा प्रविधिमन्त्री पृथ्वीसुब्बा गुरुङले नेपाल गणतन्त्रको नयाँ युगमा प्रवेश गरिसकेको बताउनुभएको छ । नेपाल पछाडि फर्कने कुनै सम्भावना नभएको उहाँको भनाइ छ ।
स्याङ्जाको वालिङमा रहेको सरस्वती माध्यमिक विद्यालयको स्वर्ण महोत्सवको उद्घाटन गर्नुहुँदै सञ्चारमन्त्री गुरुङले दरबार हत्या काण्डसँगै नेपालमा राजतन्त्रको अन्त्य भएको स्पष्ट पार्नुभयो । उहाँले भन्नुभयो, “दरबार हत्या काण्डसँगै राजतन्त्रको अन्त्य भएको हो, दलहरूले सम्मान गरेर मात्रै केही समय थामिएको हो ।”
चैत १५ गते अराजक प्रदर्शन गर्नेहरूलाई कानुन अनुसार कारबाही हुने स्पष्ट पार्नुभयो । पूर्व राजालाई सम्मान पूर्वक राखेको भन्दै मन्त्री गुरुङले यस्तै घटना घटाउँदै हिँडेमा सम्मान खोस्न बाध्य हुने चेतावनी दिनुभयो ।
गण्डकी प्रदेशका पूर्व मुख्यमन्त्री समेत रहनुभएका मन्त्री गुरुङले सरकारी विद्यलायमा राज्यको ठुलो लगानी रहेको बताउनुभयो । विद्यालय, शिक्षक र अभिभावकले शिक्षाको गुणस्तर सुधारमा विशेष ध्यान दिनु पर्ने उहाँको भनाइ छ ।
सिपमूलक शिक्षा दिनु पर्नेमा उहाँको जोड छ । विद्यालय तहमा नै सिप सिकाउनु अहिलेको आवश्यक्ता भएको मन्त्री गुरुङको भनाइ छ । दक्ष जनशक्ति निर्माणका लागि सरकारले ध्यान दिन थालेको उहाँको भनाइ छ । विज्ञान विषय बहुआयामिक विषय भएको भन्दै मन्त्री गुरुङले प्रविधिसँगै विज्ञान शिक्षाको आवश्यक्ता रहेको स्पष्ट पार्नुभयो । विद्यार्थीहरुलाई पढ्ने वातावरण विद्यालयले दिनु पर्नेमा उहाँको जोड छ ।
कार्यक्रममा पूर्व मन्त्री तथा नेकपा (एमाले)का सचिव पद्माकुमारी अर्यालले शिक्षा क्षेत्रमा ठूलो परिवर्तन आएको बताउनुभयो । शिक्षकको पीडा र जायज माग प्रति आफूहरू गम्भीर रहेको बताउनुभयो ।
व्यवस्था फेरिएको तर अवस्था नफेरिएको भन्ने गुनासो आउने गरेको भन्दै नेता अर्यालले अवस्थामा पनि परिवर्तन आएको स्पष्ट पार्नुभयो । कुनै बेला जीर्ण भवनमा बसेर अध्ययन गर्नु पर्ने अवस्था रहेको स्मरण गर्दै उहाँले गणतन्त्रले सबै सम्भव भएको बताउनुभयो ।
वालिङ नगरपालिका–१३ मा रहेको विद्यालयले विभिन्न कार्यक्रमसहित स्वर्णमहोत्सव मनाउन सुरु गरेको विद्यालय व्यवस्थापन समितिका अध्यक्ष नमलाल डुम्रेले जानकारी दिनुभयो ।
विक्रम सम्वत् २०३१ सालमा स्थापना भएको विद्यालय जिल्ला कै नमुना विद्यालयमध्ये पर्दछ । विद्यालयबाट हालसम्म दुई हजारभन्दा धेरै एसएलसीमा सहभागी भइसकेको विद्यालयका प्रधानाध्यापक यामबहादुर कुँवरले जानकारी दिनुभयो ।
विद्यालयले प्रविधि–मैत्री आवासीय शिक्षाको उद्घोष गर्दै भविष्यका योजनाहरू अघि सारेको छ । विद्यालयको विकासका लागि जग्गा खरिद अभियान चलाइँदैछ । हालसम्म १३ रोपनी जग्गा दान लिइएको छ भने विविध सहयोग जुटाएर पाँच वटा पक्की भवन निर्माण भइसकेको उहाँको प्रधानाध्यापक कुँवरको भनाइ छ ।
