रमेश विश्वकर्मा
गुल्मी, चैत २१ गते । नेपाली कांग्रेस लुम्बिनी प्रदेश उपसभापति एवम् लुम्बिनी प्रदेशका पूर्व स्वास्थ्य मन्त्री राजु खनालले स्वास्थ्य क्षेत्रमा सुधार ल्याउन आवश्यक रहेको बताउनुभएको छ । गुल्मीको सदरमुकाम तम्घासमा भएको नेपाली कांग्रेसका नेताहरूसँगको छलफलमा उहाँले यस्तो बताउनुभएको हो ।
पूर्वमन्त्री खनालले स्वास्थ्य सेवालाई निःशुल्कसँगै स्तरमा पनि राम्रो बनाउन सबै तह लाग्न जरुरी रहेको बताउनुभयो । स्वास्थ्यमा गुणस्तरीय सेवा प्रदान गर्नुका साथै विशेषज्ञ सेवा प्रदान गर्नका लागि विशेषज्ञलाई थप सुविधाको व्यवस्था गर्न जरुरी रहेको बताउनुभयो । प्रदेश सरकारले स्वास्थ्य क्षेत्रमा सुधार ल्याउन विशेष ध्यान दिन आवश्यक रहेको बताउनुभयो ।
सरकारले स्वास्थ्य बिमालाई निकै गम्भीरतापूर्वक व्यवस्थित गर्न जरुरी रहेको भन्दै उहाँले आमनागरिकलाई स्वास्थ्य सेवासँग जोड्ने नीति कार्यक्रम ल्याउन आवश्यक रहेको बताउनुभयो । विपन्न, गरिब र असहायलाई स्वास्थ्य सेवाको पहुँचमा ल्याउनुपर्ने धारणा राख्नुभयो । स्वास्थ्य क्षेत्रमा सुधार हुने गरी बजेट ल्याउनु अहिलेको आवश्यकता रहेको उहाँको भनाइ छ ।
आम नागरिकले सरकार भएको अनुभूति हुने गरी वर्तमान सरकारले काम गर्न आवश्यक रहेको कांग्रेस लुम्बिनी प्रदेशका उपसभापति भुवनप्रसाद श्रेष्ठले बताउनुभयो । शिक्षा र स्वास्थ्यको क्षेत्रमा सरकार चुकेको भन्दै उहाँले संविधान लेखिएका कुराहरूको सहि पालना नभएको बताउनुभयो । हरेक क्षेत्रमा सुशासन र पारदर्शिता भएको उपसभापति श्रेष्ठले बताउनुभयो ।
हरेक क्षेत्रमा सबैले सुशासनलाई ख्याल गर्नुपर्ने नेपाली कांग्रेस गुल्मीका सभापति एवम् रेसुङ्गा नगरपालिकाका नगर प्रमुख खिलध्वज पन्थीले बताउनुभयो । देशमा सुशासन कायम गर्नका लागि नीतिगत सुधारमा विशेष ध्यान दिनुपर्ने भन्दै उहाँले सङ्घीयता कार्यान्वयनमा सबै पक्ष लाग्नुपर्ने बताउनुभयो ।
नागरिकले सहज रूपमा सेवा पाउने नीति बनाउन आवश्यक रहेको हुँदा नागरिकमा उत्साह हुने खालका नीति ल्याउन जरुरी रहेको बताउनुभयो ।
