अनिल पराजुली
हेटौँडा, चैत १५ गते । मकवानपुरको मनहरी गाउँपालिका वडा नं. ६ लोथरमा भएको सवारी दुर्घटनामा परेर एक जनाको मृत्यु भएको छ । शुक्रवार बिहान ३ बजेर १५ मिनेटको समयमा दुर्घटना हुँदा म्याजिक गाडीका चालक मकवानपुर राक्सिराङ गाउँपालिका–४ बस्ने ३२ वर्षीय सन्देश कोइरालाको मृत्यु भएको हो ।
सवारी दुर्घटनामा कोइरालाको खुट्टा, टाउको र शरीरको विभिन्न भागमा चोट लागेर गम्भीर घाइते भई उपचारको लागी चितवन नयाँ मेडिकल कलेज भरतपुर पटाइएकोमा शुक्रवार बिहान ४ बजेर १५ मिनेटको समयमा मृत्यु भएको थियो ।
पूर्व पश्चिम राजमार्ग अन्तर्गत लोथर बजारमा चितवनबाट हेटौँडा तर्फ आउँदै गरेको बा.प्र.०३–००६ ख ५६८१न.को बस र मनहरीबाट चितवन तर्फ जाँदै गरेको बा.प्र.०३–००१ च ३०१२ नं.को म्याजिक खाली गाडी एक आपसमा ठक्कर खाई दुर्घटना भएको हो ।
मृतकको शव चितवन नयाँ मेडिकल कलेज भरतपुरमा रहेको छ भने बस चालक प्रहरीले नियन्त्रणमा लिएको जिल्ला प्रहरी कार्यालय मकवानपुरका प्रहरी उपरीक्षक विश्वराज खड्काले जानकारी दिनुभयो ।
