राजन रावत
हुम्ला, चैत ११ गते । कर्णाली करिडोरको हुम्ला जिल्लाको सर्केगार्ड गाउँपालिकाको केन्द्र सर्केगार्ड बजार क्षेत्रको डेढ वर्षदेखि अवरुद्ध हुँदै आएको सडकको निर्माण कार्य सुरु भएको छ । हिल्सा सिमकोट सडक आयोजनाको समन्वयमा स्थानीय जग्गाधनी र आयोजनाबिच बिबाद समाधान गर्ने गरी समझदारी भएपछि रोकिएको काम अगाडि बढेको हो ।
चार दिन लगातार सडक निर्माण क्षेत्रका जग्गाधनीसँगको छलफलपछि रोकिएको सडक निर्माण कार्य अगाडि बढाउने सहमति भएपछि निर्माण कम्पनीले काम सुरु गरेको आयोजनाका योजना प्रमुख बेलबहादुर नेपालीले बताउनुभयो ।
करिडोरको सलीसल्लाबाट सर्केगार्डतर्फको सडक निर्माण कार्य सर्केगार्ड बजार क्षेत्रमा अगाडि बढेपछि जग्गाधनीले विरोध गर्दा काम रोकिएको थियो । उहाँले सो क्षेत्रको सडक आयोजना, जग्गाधनी, निर्माण व्यवसायी र गाउँपालिकाको सहभागितामा बसेको बैठकले १२ मिटर चौडा सडक निर्माण गर्ने समझदारी भएपछि काम सुरु भएको उहाँले बताउनुभयो ।
सर्केगाड बजार क्षेत्रको पाँच सय मिटर सडकको निर्माण कार्य धमाधम भइरहेको बताउनुहुँदै उहाँले सडक निर्माणका क्रममा सात वटा घर र १६ वटा टहरा भत्काउनु पर्ने जानकारी दिनुभयो । यसअघि सलीसल्लादेखि लेप्चेसम्मको सडक निर्माण कम्पनीले सलीसल्ला सर्केगार्ड र सर्केगार्डदेखि ल्याप्चेसम्मको सडकको ट्रयाक खुलाउने कार्य पूरा भइसकेको थियो । निर्माण कार्य बन्द गरिएको क्षेत्रमा पनि साँँघुरो सडक भने निर्माण भई यातायातका साधनहरु सुचारु भइरहेका थियो । दुई वटा स्थानमा काम केही बाँकी रहेका कारण निर्माण कम्पनीको भुक्तानी समेत रोकिएको थियो ।
उहाँले अहिले नियमानुसार सडक चौडा गर्ने कार्य भइरहेको र त्यो पनि अन्तिम चरणमा पुगेको बताउनुभयो ।
गाउँपालिक अध्यक्ष ठनबहादुर रोकायाले सहमतिपछि रोकिएको क्षेत्रमा मेशिन लगाएर सडक चौडा गर्ने कार्य धमाधम भइरहेको र अब चाँडै सम्पन्न हुने बताउनुभयो । यो सडक चौडा गर्ने कार्यमा गाउँपालिका सम्पूर्ण रुपमा सहयोग गर्न तयार रहेको र निर्माण कम्पनीले पनि काम तीव्र पार्नु पर्ने उहाँको भनाइ छ । यति काम पूरा भएपछि उक्त सडकको टयक खोल्ने कार्य पूरा हुने छ । यो खण्डको सडक निर्माणका लागि आयोजनाले सपना धुलिखेल जेभीसँग २०७४ साल साउन ६ गते सम्झौता गरेको थियो ।
सुरुमा २०७६ साल साउन १५ गते सडकको निर्माण कार्य सम्पन्न गर्ने गरी सम्झौता भएको भए पनि निर्माण सामग्री र मेसिन निर्माण स्थल पुर्याउन नसकिएको कारण सात पटकसम्म म्याद थप गर्ने कार्य भएको थियो । यो खण्डको सडक निर्माणका लागि आयोजनाले १७ करोड ७१ लाख ५६ हजार ६४६ रुपियाँ लागत लाग्ने गरी निर्माण कम्पनीसँग सम्झौता गरेको थियो ।
