.jpg)
हुम्ला समाचारदाता
हुम्ला, फागुन २३ गते । दुर्गम जिल्ला हुम्लाका ८८ प्रतिशत घरधुरीका बासिन्दामा स्वच्छ खानेपानीको पहुँच पुगेको छ । खानेपानीसम्बन्धी काम गर्ने आधा दर्जन सरकारी तथा गैरसरकारी निकायले बर्सेनि खानेपानी योजना निर्माण गरेर सञ्चालनमा आएपछि स्वच्छ पानीको पहुँच वृद्धि हुँदै गएको हो ।
खानेपानी, सिँचाइ तथा ऊर्जा विकास कार्यालयका प्रमुख ज्वालाराज शाहीले राष्ट्रिय जनगणना–२०७८ अनुसार जिल्लाको कुल घरधुरी सङ्ख्यामध्ये हालसम्म ८८.१८ प्रतिशत हुम्लावासीका घरधुरी स्वच्छ खानेपानीको पहुँचमा रहेको बताउनुभयो । यो विवरणमा ६३.८८ प्रतिशत हुम्लावासीका घरधुरी सार्वजनिक खानेपानीका धाराबाट पानी उपभोग गरिरहेका छन् भने २४.३० प्रतिशत घरधुरीले व्यक्तिगत धारा निर्माण गरेर स्वच्छ खानेपानी उपभोग गरेका छन् । आर्थिक वर्ष २०८०/८१ सम्म जिल्लाको कुल घरधुरी सङ्ख्या ११ हजार २०४ रहेको छ । त्यसमा दुई हजार ७२३ घरधुरीले व्यक्तिगत धारा प्रयोग गरेका छन् भने सात हजार १५७ घरधुरीले सार्वजनिक धाराको पानी उपभोग गरिरहेको उहाँले बताउनुभयो ।
व्यक्तिगत र सार्वजनिक धाराबाट स्वच्छ खानेपानी उपभोग गर्ने घरधुरी सङ्ख्या नौ हजार ८८० रहेको छ । उहाँले विगत तीन वर्षयता जिल्लामा स्वच्छ खानेपानीको उपभोग गर्ने घरधुरी वृद्धि भइरहेको समेत बताउनुभयो । जनगणना अनुसार हुम्ला जिल्लाको कुन जनसङ्ख्या ५५ हजार ३९४ छ । उहाँले चालु आवमा जिल्लाभर २८ वटा खानेपानी योजना निर्माणाधीन रहेकाले आगामी असारसम्म ती योजनाको निर्माण सम्पन्न हुने र जिल्लाको स्वच्छ खानेपानीको उपभोग गर्ने घरधुरीको सङ्ख्या वृद्धि हुने जानकारी कार्यालय प्रमुख शाहीले दिनुभयो ।
खार्पुनाथ गाउँपालिकाका अध्यक्ष कर्णबहादुर रावलले यसरी स्वच्छ खानेपानीको उपभोग गर्ने घरधुरी वृद्धि हुनुमा खानेपानी तथा सरसफाइका क्षेत्रमा काम गर्ने सरकारी तथा गैरसरकारी निकायका कारण त्यो सम्भव भएको बताउनुभयो । उहाँले हाल जिल्लामा खानेपानी तथा सरसफाइका क्षेत्रमा काम गर्ने सङ्घीय सरकार, प्रदेश सरकार, स्थानीय तह, सुस्वा, गुडनेवर्स इन्टरनेसनल नेपाललगायतका संस्थाले काम गरिरहेकाले स्वच्छ खानेपानी प्रयोग गर्ने घरधुरी वृद्धि भएको बताउनुभयो । नाम्खा गाउँपालिका–२ का स्थानीय उटुप लामाले स्वच्छ खानेपानीको पहुँच हुम्लावासीमा बढ्दै जानु सकारात्मक पक्ष भएको बताउँदै अब बाँकी रहेको घरधुरीलाई पनि चाँडै स्वच्छ खानेपानीको पहुँचमा ल्याउनुपर्ने जनाउनुभयो ।
