खलङ्गा समाचारदाता
जाजरकोट, फागुन २३ गते । पुष्पलाल मध्यपहाडी लोकमार्ग अन्तर्गत भेरी नगरपालिका–१३, कुदु–कार्कीगाउँ सडकखण्ड अलपत्र परेको छ । निर्माण व्यवसायीको लापर्बाहीका कारण समयमै लोकमार्गको काम सम्पन्न नहुँदा सर्वसाधारणले सास्ती पाउने गरेका छन् । भेरी नगरपालिका–१३, कुदु जिरो प्वाइटदेखि कार्कीगाँउसम्म अलपत्र परेको हो ।
सरकारको गौरवको आयोजनामध्ये पुष्पलाल मध्यपहाडी लोकमार्गको निर्मणाधीन अवस्थामा रहेको सडक चार वर्षअघि नै निर्माण सम्पन्न हुनुपर्ने हो तर निर्माण व्यवसायीको लापर्बाहीका कारण लगातर पाँच पटक म्याद थप्दा पनि सम्पन्न हुन सकेको छैन । सडक विभागसँग शर्मा/सिंह एन्ड ब्रदर्स जेभीले विसं २०७४ मा भेरी नगपालिका–१३, कुदु, जगतीपुर, कार्कीगाँउ, काँडा, झाप्रासम्म चार वटा प्याकेजमा स्तरोन्नतिसहित कालोपत्रेका पहिलो प्याकेज ४८ करोड ५८ लाख ४२ हजार ७१९ रुपियाँ, दोस्रो प्याकेज ५० करोड २७ लाख ८४ हजार २६८ रुपियाँमा सम्झौता गरेको थियो । दुई वर्षभित्र निर्माण सम्पन्न गर्न लिएको काम ठेकेदारको लापर्बाहीले ढिलासुस्तीका कारण आठ वर्षसम्म निर्माण नहुँदा सर्वसाधारणले सास्ती पाउने गरेका छन् । सोही खण्ड अन्तर्गत तेस्रो र चौथो प्याकेज २०७६ मा निर्माण सम्पन्न गर्न सडक विभागसँग ४२ करोड एक लाख ८९ हजार ९६३ र ४० करोड ५७ लाख ८२ हजार ६३९ रुपियाँमा शर्मा÷सिंह एन्ड ब्रदर्श जेभीले सम्झौता गरेको थियो ।
पहिलो र दोस्रो प्याकेजको पाँच पटक म्याद थप गरिए पनि सम्पन्न हुन सकेको छैन । त्यसै गरी तेस्रो र चौथो प्याकेज दुई पटक म्याद थप गरिएको छ । पटक–पटक म्याद थप गरे पनि कामले गति लिन सकेको छैन । एउटा काम २०८१ असोज ३० गते, अन्य तीन वटा प्याकेज २०८१ पुसमा म्याद सकिएको छ ।
पुष्पलाल मध्यपहाडी लोकमार्गका इन्जिनियर अमितकुमार मण्डलका अनुसार समयमा काम सम्पन्न गर्न कार्यालयले ताकिता गरे पनि निर्माणको जिम्मा लिएका व्यवसायीले बेवास्ता गरेपछि समस्या भएको बताउनुभयो । उहाँले पटक पटक म्याद थप गरी समयमा सम्पन्न गर्न सुझाव दिएको तर निर्माण व्यवसायीको ढिलासुस्ती लापर्बाहीले जनताले आउजाउमा दुःख पाउने गरेको जनाउनुभयो । म्याद सकिएको दुई महिना बित्न थाल्यो निर्माण व्यवसायीले म्याद थपका लागि निवेदन दिएको छ । सरकारले अहिले म्याद थपको काम रोखेकाले थप हुने नहुने भन्न नसक्ने उहाँको भनाइ छ ।
भेरी नगरपालिका–९ का पूर्णदेव शर्माका अनुसार मध्यपहाडी लोकमार्गको कुदुदेखि कार्कीगाउँ, काँडा हुँदै झाप्रासम्मको निर्माणको जिम्मा लिएको शर्मा/सिंह एन्ड ब्रदर्स जेभीले लापर्बाही गरेपछि सर्वसाधारणले आउजाउमा दुःख पाउने गरेका छन् । सरोकारवाला निकायले पहल नगरेका कारण समस्या आएको छ । छेडागाड नगरपालिका–१३ का गणेशबहादुर बस्नेतले सरकारले करोडौँ बजेट लगानी गरे पनि ठेकेदारको लापर्बाहीले बर्खामा हिलाम्मे, हिउँदमा धुलाम्मे बाटोमा हिँड्नु परेको गुनासो गर्नुभयो ।
भेरी नगरपालिका जगतीपुर, भुर, छेडागाड नगरपालिकाको कार्कीगाउँ, काँड, झाप्रा सडकखण्ड जोखिममा रहेको छ । मध्यपहाडी लोकमार्ग जाजरकोट खण्ड ट्र्याक खुलेको एक दशकभन्दा बढी भएको छ । छेडागाड नगरपालिका–१२ स्थित मन्तार भिरको ट्र्याक खुलेको छैन । सोही ठाउँमा ट्रयाक नखुलेपछि दैलेख पुग्न छेडाचौर मोर्कबजार, थलहबजार जानुपर्ने बाध्यता छ । लोकमार्गको कामले गति लिएको भए जाजरकोटदेखि दैलेख करिब चार घण्टा लाग्ने गर्छ । ठाउँ ठाउँमाा सडक बिग्रिएपछि यातायात व्यवसायीले मनपरी भाडा असुल्ने गरेका छन् ।
