छिन्चु समाचारदाता
सुर्खेत, फागुन २३ गते । कर्णाली प्रदेश सभामा धेरै जसो प्रदेश सभा सदस्यहरू प्रदेश सभामा उपस्थित हुने गरेको पाइएको छ । कर्णाली प्रदेश सभाको दोस्रो कार्यकालको २०७९ पुस १८ गते कर्णाली प्रदेश सभाको दोस्रो कार्यकालको पहिलो बैठक बसेको थियो । त्यसयता २०८१ असोज १५ सम्म जम्मा ९६ वटा बैठक बसेका थिए । यो अवधिसम्म कुल ९६ वटा बैठक बसेका छन् ।
प्रदेश सभामा पहिलो अधिवेशनदेखि चौथो अधिवेशनसम्म प्रदेश सभा सदस्यको उत्साहजनक सहभागिता देखिएको छ । कर्णाली प्रदेश सभाका सभामुख नन्दा गुरुङ चौथो अधिवेशनसम्म सञ्चालनमा आएका ९६ वटा बैठकमा नै उपस्थित हुनुभएको छ ।
यो अवधिमा मुख्यमन्त्री यामलाल कँडेल सबैभन्दा धेरै प्रदेश सभा बैठकमा उपस्थित हुनुभएको छ भने आर्थिक मामिला तथा योजनामन्त्री राजीवविक्रम शाह सबैभन्दा कम उपस्थित हुनुभएको छ । मन्त्री शाह ९६ दिनको बैठकमा जम्मा ४९ दिन मात्रै उपस्थित हुनुभएको छ ।
उपसभामुख यशोदा न्यौपाने ८९ दिन बैठकमा उपस्थित हुनुभएको छ । अन्य प्रदेश सभा सदस्य इन्द्राकुमारी शाही ८८ दिन, पूर्वऊर्जामन्त्री उर्मिला विश्वकर्मा ८३ दिन, कलबहादुर हमाल ८३ दिन, कल्याणी खड्का ७७ दिन प्रदेश सभा बैठकमा उपस्थित हुनुभएको छ । पूर्वमन्त्री कृष्णबहादुर बिसी ७८ दिन, पूर्वमन्त्री कृष्णबहादुर जिसी ९३ दिन उपस्थित हुँदा पूर्वमन्त्री खड्गबहादुर पोखरेल ८९ दिन उपस्थित हुनुभएको प्रदेश सभा सचिवालयले जनाएको छ ।
भौतिक पूर्वाधार तथा सहरी विकास राज्यमन्त्री गमता विक ९४ दिन, सामाजिक विकासमन्त्री घनश्याम भण्डारी ८७ दिन सदनमा उपस्थित हुँदा जानकी सिंह ७२ दिन उपस्थित हुनुभएको छ । पूर्वमन्त्री जितबहादुर मल्ल ८६ दिन, पूर्वमुख्यमन्त्री जीवनबहादुर शाही ५६ दिन उपस्थित हुनुभएको छ । सधैँ बैठकमा उपस्थित हुने शाहीमाथि अख्तियारले मुद्दा चलाएकोले उहाँ निलम्बनमा पर्नुभएको थियो ।
पूर्वमन्त्री टेकराज पछाई ९४ दिन, जुम्कित लामा कार्की ९० दिन, तुलसा मल्ल ८९ दिन, दक्षिणा शाही ८५ दिन, पूर्वमन्त्री दुर्गबहादुर रावत ९२ दिन, देवेन्द्रबहादुर शाही ८८ दिन सदनमा उपस्थित भएको प्रदेश सभा सचिवालयले दिएको तथ्याङ्क रहेको छ । पूर्णबहादुर खत्री ८७ दिन, पूर्वमन्त्री वीरबहादुर शाही ८७ दिन, पूर्वमन्त्री भीमप्रकाश शर्मा ७४ दिन, पूर्वमन्त्री मङ्गलबहादुर शाही ८३ दिन, पूर्वमन्त्री महेन्द्र केसी ८२ दिन, मिलन खड्का रोका ९२ दिन यो अवधिमा बैठकमा उपस्थित हुनुभएको छ । पूर्वमन्त्री रनसिंह परियार ९२ दिन, पूर्वमुख्यमन्त्री राजकुमार शर्मा ७७ दिन र लक्ष्मी सुनार ९१ दिन उपस्थित हुनुभएको छ ।
यसैगरी यो अवधिमा बलीमाया बुढा ९० दिन, ऊर्जामन्त्री विजया बुढा ९१ दिन, पूर्वमन्त्री विन्दमान विष्ट ८१ दिन, भूमि व्यवस्था कृषि तथा सहकारीमन्त्री विनोदकुमार शाह ८२ दिन, पूर्वमन्त्री वेदराज सिंह ९० दिन, भौतिक पूर्वाधार तथा सहरी विकासमन्त्री शेरबहादुर बुढा ७७ दिन, सन्तोषी शाही ६७ दिन, उद्योग पर्यटन वन तथा वातावरणमन्त्री सुरेश अधिकारी ८९ दिन र हिक्मतबहादुर विष्ट ९३ दिन हाजिर हुनुभएको छ ।
राजनीतिक विश्लेषक पीताम्बर ढकालले प्रदेश सांसदहरू जनताका प्रतिनिधि भएका कारण हरेक बैठकमा उपस्थित हुनुपर्ने बताउनुहुन्छ । उहाँले भन्नुभयो, “उहाँहरू कर्णालीका १७ लाख जनताको प्रतिनिधि हो । उहाँहरूले प्रदेश सभा बैठकमा जनताको आवाज उठाउनु पर्छ । तथ्याङ्क अनुसार प्रदेश सभा सदस्यको उपस्थिति राम्रो देखिएको छ । यो गजबको कुरा हो ।”
