हरिकृष्ण ऐडी
मुगु, फागुन १८ गते। गएको बिहीबारदेखि जिल्लाको सिमाना घुच्चीलेकमा हिउँ जमेसँगै अवरुद्ध भएको नाग्म गमगढी लोगमार्ग आइतबारदेखि सुचारु भएको छ।
जिल्ला प्रशासन कार्यालय मुगुको पहलमा नाग्म-गमगढी लोगमार्ग खण्डको बुलबुले क्षेत्रदेखि घुच्चिलेखको सातमोड पिना क्षेत्रसम्म जमेको हिउँ एक्साभेटरको प्रयोग गरेर पन्छाउने काम सम्पन्न गरिएको हो।
सडक डिभिजन कार्यालय जुम्लाका प्राविधिक जग्गी विसीका अनुसार उक्त क्षेत्रको सडकमा दुई फिटसम्म हिउँ शुक्रबार बिहानदेखि हटाएर आइतबार साँझदेखि सडक संचालनमा ल्याइएको हो।
सडक खुलेसँगै दर्जनौं यात्रुबाहक गाडी, मालबाहक गाडी लगायत तरकारीबोकेका गाडीहरु गन्तव्य तर्फ गएका छन्।
विगत वर्षमा वर्षामा पानी र हिउँदमा हिउँ पर्दा यो खण्डको सडक महिना दिनसम्म अवरुद्ध हुने गरेको स्मरण गर्दै चालक धनसिंह वलीले यो पटक सडक डिभिजन कार्यालय जुम्लाले पहिरो र हिउँ पन्छाउन ठाँउ ठाँउमा एक्साभेटर र कर्मचारी तयारी अवस्थामा राख्दा सहज भएको बताउनुभयो।
