दी एन्जल्स ब्यान्डको ‘कति छन्’

गोरखापत्र समाचारदाता

काठमाडौँ, कात्तिक २४ गते ।  दी एन्जल्स ब्यान्डले ‘कति छन्’ शीर्षकको नयाँ गीत सार्वजनिक गरेको छ । गीतमा ब्यान्डका प्रमुख गायक राजु लामाको आवाज रहेको छ । गीतको सङ्गीत र शब्द स्व. सुनील बर्देवाले तयार पार्नुभएको थियो ।

गीतले नेपाली सङ्गीतप्रेमीमाझ बर्देवाको योगदानलाई पुनः स्मरण गराएको छ । गीतको भिडियोमा दी एन्जल्स ब्यान्डका सदस्यको प्रस्तुति रहेको छ, जसमा गायक राजु लामासँगै राजेश, विकास र तासी रहनुभएको छ । अमेरिकामा रेकर्ड गरिएको गीतको छायाङ्कन पनि अमेरिकामै गरिएको हो । गायक लामाले भिडियोको अवधारणा तयार पार्नुभएको हो । गीत स्वर्गीय गुरु बर्देवालाई श्रद्धाञ्जलीस्वरूप समर्पित गरिएको गायक लामाले बताउनुभयो । बर्देवा नेपाली पप सङ्गीतका चर्चित गायक, गीतकार, सङ्गीत संयोजक र गितारवादक हुनुहुन्थ्यो, जसले गितारमा विशेष दक्षता हासिल गर्नुभएको थियो । उहाँका ‘गोरटो अनि उस्तै छ गल्ली’ र ‘बिहानीमा’ जस्ता गीत विशेष चर्चित छन् ।