गोरखापत्र अनलाइन
काठमाडौं, कात्तिक १७ गते । तराई विकास तथा सञ्चार केन्द्र नेपालले स्वस्थ वातावरण निर्माण गर्ने उद्देश्य साथ वृक्षरोपण अभियान जारी राखेको छ । जन्मदिनको अवसरमा विभिन्न व्यक्तित्वलाई वृक्षरोपण गर्न उत्प्रेरित गर्ने अभियानले जन्मदिनलाई सत्कर्मसँग जोड्ने काम गरेको छ ।
गत वर्षदेखि सुरु गरिएको अभियान अन्तर्गत विभिन्न ठाउँमा अहिलेसम्म करिब पाँच हजार पाँचसय बिरुवा रोपिएको अभियानका संयोजक तथा पत्रकार गोविन्द चौलागाईंले बताउनुभयो । अभियान अन्तर्गत काठमाडौंको पाशुपत क्षेत्र, गोकर्णेश्वर, रौतहट, पर्साका विभिन्न ठाउँमा जन्मदिनको अवसरमा व्यक्तिहरुले वृक्षरोपणको काम गर्दैआएको उहाँले बताउनुभयो ।
अभियानमा प्रहरी नायब निरीक्षक प्रराज चौलागाईंलगायतको समूहले सहयोग गरिरहेको उहाँले बताउनुभयो । जन्मदिनको अवसरमा रोपिने बिरुवा वन कार्यालयले सहयोग गराइरहेको उहाँको भनाइ छ । वृक्षरोपण गरी वातावरणलाई स्वच्छ बनाउन र मानवका लागि अक्सिजन उपलब्ध हुने हुनाले यो अभियानलाई जारी राखिएको उहाँले बताउनुभयो ।
