गायक प्रकाशको निधन

काठमाडौँ, साउन २८ गते । ‘मान्छे रैछे खल्ली हजुर अर्कैसँग चली, प्रिय तिम्रै सिउँदोमा सिन्दूर भर्न देऊ...’ लगायत दर्जनौँ चर्चित गीतका गायक प्रकाश तिमिल्सिनाको ३७ वर्षको उमेरमा शनिबार राति निधन भएको छ । गायक तिमिल्सिनाको आइतबारै पशुपति आर्यघाटमा अन्त्येष्टि गरिएको छ । त्यसअघि नेपाल सङ्गीत तथा नाट्य प्रज्ञा–प्रतिष्ठानमा अन्तिम श्रद्धाञ्जलीका लागि प्रकाशको शव राखिएको थियो । 

जिल्ला प्रहरीपरिसर, ललितपुरका अनुसार गायक तिमिल्सिना ललितपुर महानगरपालिका–१८ स्थित आफ्नै कोठामा शनिबार राति ९ बजे मृत भेटिनुभएको हो । प्रहरीपरिसर ललितपुरका प्रवक्ता एसपी नरेशराज सुवेदीका अनुसार गायक तिमिल्सिना बेहोस अवस्थामा रहेको सूचना पाएपछि पाटन अस्पताल पुर्‍याइए पनि चिकित्सकले मृत घोषणा गरिदिएका थिए ।

सुनसरी प्रकाशपुरका तिमिल्सिनाले रियालिटी सो ‘नेपाली तारा’ बाट साङ्गीतिक यात्रा सुरु गर्नुभएको थियो । बाल्यकालदेखि नै गीत गाउने प्रकाशले ‘दिव्य दृष्टि’ (२०६६) र कलेक्सन एल्बम ‘आरती ६६’ सार्वजनिक गर्नुभएको थियो । ‘आरती ६६’ को ‘प्रिय तिम्रो सिउँदोमा’ गीतले प्रकाशलाई नेपाली गायनमा स्थापित गरिदिएको थियो । अङ्ग्रेजी र नेपालीसहित भाषाभाषी गीत गाउने क्षमता राख्ने प्रकाशले बाल्यकालमै दृष्टि गुमाउनुभएको थियो । 

विसं २०४४ वैशाख १ मा जन्मिएका प्रकाशले दुःखकष्टमै बाल्यकाल बिताउनुभएको थियो । २०४५ सालमा आएको कोशीको बाढीले प्रकाशको सिङ्गो परिवार नै बगाएको थियो । बाढीमा परेका प्रकाशलाई भोलिपल्ट माझीले माछा मार्ने क्रममा फेला पारेका थिए, जो प्रकाशकै मितबाबु थिए । बाढीमा परेर चोटैचोट भएका प्रकाशले दृष्टि गुमाएका थिए । घरबाहिर भएका कारण जीवित हजुरआमा देवीमाया तिमिल्सिनाले अरूको घरमा काम गरेर प्रकाशलाई हुर्काउनुभएको थियो ।

दृष्टि गुमेका कारण अन्य बालबालिकासँग खेल्न नसक्ने प्रकाश क्यासेट प्लेयरका गीत सुनेर गाउँदै बस्न थाल्नुभयो । त्यही क्रममा छ/सात वर्षकै उमेरमा चकलेट र बिस्कुटको आसमा गाउँलेको आग्रह अनुसार प्रकाशले गीत गाउन थाल्नुभएको थियो । स्वर्गीय प्रकाशकी श्रीमती दिव्या तामाङ हुनुहुन्छ ।