स्याङ्जामा गल्याङ प्रिमियर लिग क्रिकेट प्रतियोगिता हुुने

राधाकृष्ण डुम्रे

वालिङ, साउन १५ गते । स्याङ्जामा ‘गल्याङ प्रिमियर लिग क्रिकेट प्रतियोगिता’ (जिपिएल) हुने भएको छ । गल्याङ क्रिकेट संघको आयोजनामा खेल हुन लागेको हो । 

आगामी भदौ १ गते बाट सुरु हुने प्रतियोगितामा आठ टिमको सहभागिता रहने आयोजक समितिका उपाध्यक्ष खगेन्द्र भण्डारीले जानकारी दिनुभयो । प्रतियोगितामा पहिलो हुनेले रु. एक लाख र दाेस्रो हुनेले रु. ५० हजार सहित विभिन्न पुरस्कार प्राप्त गर्ने उपाध्यक्ष भण्डारीको भनाइ छ । सङ्घले पत्रकार सम्मेलन गरेर प्रतियोगिताको बारेमा जानकारी गराएको हो । 

बर्खाको समयमा खेल प्रभावित नहोस भनेर तीन ठाउमा खेल मैदान छनोट गरिएको संस्थाका सचिव अमृत खनालले बताउनुभयो । उहाँका अनुसार गल्याङ १ मालुुङ्गा खेल मैदान, गल्याङ ११ दिमिक क्रिकेट मैदान र पाल्पाको रम्भा गाउपालिका १ असेर्दीलाई छनोट गरिएको छ । 

जिल्लामा नै ठूलो धनराशी रहेको प्रतियोगिताले खेलाडि उत्पादनमा सहयोग पुग्ने सङ्घका अध्यक्ष ठगेन्द्र थापाको भनाइ छ । विभिन्न दाता र स्थानीय सरकारको सहयोगमा प्रतियोगिता गर्न लागिएको उहाँको भनाइ छ ।