नक्साबाटै बाढीको पूर्व सूचना दिने प्रणाली व्यवस्थापन

गोकर्ण पौडेल 

तुलसीपुर साउन ७ गते । बबई नदीमा आउन सक्ने बाढीका विषयमा नक्साबाटै जानकारी लिन सक्ने प्रणालीको व्यवस्थापन गर्न थालिएको छ । नेपाल सरकार जल तथा ऊर्जा आयोगको एक टोलीले बबई नदीमा आउने बाढीका विषयमा अध्ययन गरी नक्सा प्रणालीका बारेमा व्यवस्थापन गर्न थालेको हो । 

जल तथा ऊर्जा आयोगको सचिवालयका इन्जिनियर गायत्रा जोशीले बबई नदीमा आउने बाढीलाई नक्साङ्कनका विषयमा १४ वर्षअघि अध्ययन गरिए पनि त्यो विस्तृत अध्ययन नभएको बताउनुभयो । उहाँले पुन : विस्तृत रूपमा अध्ययन गरेर बाढीले क्षति पुर्‍याउने आवासीय र खेती योग्य क्षेत्रको निर्धारण गरिने बताउनुभयो । उहाँले नक्सा तयार पारेर तुलसीपुर उपमहानगरपालिकासहित बबई नदीको बाढीले क्षति पुर्‍याउने बबई गाउँपालिकाको क्षेत्रको समेत विस्तृत विवरण तयार पारिने बताउनुभयो । 

तुलसीपुर उपमहानगरपालिकाका नगर प्रमुख टीकाराम खड्काले तत्कालका लागि बबई नदीमा आएको बाढीका विषयमा जानकारी लिनका लागि वडा नम्बर १४ मा पानीको सतह बढेपछि पालिकाको विपद् शाखामा साइरन बज्ने व्यवस्था मिलाइएको बताउनुभयो । उहाँले बबई नदीमा आएको बाढीका कारण बर्सेनि धनजनको क्षति भइरहेकाले बबई नदीको दुवैतर्फ तटबन्ध गर्नका लागि तीनै तहका सरकारले नीति कार्यक्रम र बजेटमा समावेश गर्नुपर्ने बताउनुभयो । उहाँले अब तयार गरिने नक्साङ्कन सूचना प्रणालीमा आवासीय क्षेत्रलाई विशेष ध्यान दिनुपर्ने बताउनुभयो । 

तुलसीपुर उपमहानगरपालिकाको वडा नम्बर १४,१३,१२ र ११मा बबई नदीले क्षति पुगाउने गरेको छ । 

बबई गाउँपालिका ६ का पूर्ववडाध्यक्ष रामबहादुर वलीले बबई नदीमा आउने बाढीले सबैभन्दा बढी गाउँपालिकाको ६ मा र ५ र १ मा क्षति पुर्‍याउने बताउनुभयो । तुलसीपुर उपमहानगरपालिका १२ कचिलाका किसान डिल्लीबहादुर थारुले बबई नदीको बाढीका कारण सिँचाइ कुलो र खेतीयोग्य जमिनमा क्षति पुर्‍याउँदै आएको बताउनुभयो । 

तुलसीपुर खानेपानी तथा उपभोक्ता तथा सरसफाइ संस्थाका सचिव सेवकराम भण्डारीले बबई नदीको बाढीका कारण खानेपानीको सम्बोयलमा समेत क्षति पुग्ने सक्ने बताउनुभयो। उहाँले नदी तटीय क्षेत्रमा सम्बोयल भएकाले एक लाख बढी जनसङ्ख्यालाई खानेपानी वितरण गर्दै आएको संस्थाले बबई नदीमा बाउने बाढीले क्षति पुर्‍याउन सक्ने भएकाले तटीय क्षेत्रमा तटबन्ध आवश्यक रहेको बताउनुभयो ।