गोकुल भुजेल
भोजपुर, वैशाख १५ गते । ब्वाइज युनाइटेड काठमाडौँ भोजपुरमा जारी सातौँ संस्करणको अन्तर्राष्ट्रिय आमन्त्रित मेयर भोजपुर गोल्डकप प्रतियोगिताको फाइनलमा प्रवेश गरेको छ । आज भएको दोस्रो सेमिफाइनलमा सहलेश युवा क्लब सिराहालाई २–१ गोलअन्तरले हराउँदै चर्च ब्वाइज युनाइटेड काठमाडौँले फाइनलको यात्रा तय गरेको हो ।
खेलको ३१औँ मिनेटमा सहलेश युवा क्लबका तर्फबाट आशीष चापागाईँले गोल गर्दै टोलीलाई अग्रता दिलाए तर ब्वाइज युनाइटेडका लागि नवीन लामाले ४३औँ मिनेटमा ‘पेनाल्टी’मार्फत गोल गरेपछि पहिलो हाफमा खेल बराबरीमा पुगेको थियो ।
खेलको अतिरिक्त समय ब्वाइज युनाइटेडका लागि अर्मानले गोल गरेपछि टोली फाइनलमा प्रवेश गरेको हो । ‘प्लेयर अफ दी म्याच’ चर्च ब्याइजका अवोयोमी भए । उनले रु पाँच हजार र पदक प्राप्त गरे । कूल आठ टोलीको सहभागी प्रतियोगिताअन्तर्गत बिहीबार भएको पहिलो सेमिफाइनलमा भगवती स्पोर्टस क्लब खोटाङलाई ‘पेनाल्टी सुट आउट’मा हराउँदै त्रिभुवन आर्मी क्लब फाइनल प्रवेश गरेको थियो । उपाधिका लागि शनिबार त्रिभुवन आर्मी क्लब र चर्च ब्वाइज युनाइटेड काठमाडौँ बिचमा प्रतिस्पर्धा हुने छ ।
प्रतियोगिताका विजेता तथा उपविजेताले उपाधिसहित क्रमशः रु पाँच लाख र रु तीन लाख पाउनेछन् । यही वैशाख ९ गतेदेखि सुरु प्रतियोगितामा ‘ए’ डिभिजनका दुई टोली त्रिभुवन आर्मी क्लब, चर्च ब्वाइज युनाइटेड, भारतको जर्जियन फुटबल क्लब, खोटाङ भगवती स्पोर्ट्स क्लब, सलहेश युवा क्लब सिराहा, राजारानी फुटबल क्लब धनकुटा, डाँगिहाट यूथ क्लब मोरङ र आयोजक भोजपुर जिल्ला फुटबल सङ्घ गरी आठ टोलीको सहभागिता थियो ।
भोजपुर जिल्ला फुटबल सङ्घको आयोजना तथा भोजपुर नगरपालिकाको मुख्य प्रायोजनमा प्रतियोगिता भइरहेको छ ।
