राजन रावत
हुम्ला, फागुन १८ गते । हुम्लामा मुख्यमन्त्री रोजगार कार्यक्रमले फलफूला बिरुवा वितरण गरेको छ । तत्कालीन रोजगारीका साथै दीर्घकालीन रुपमा आम्दानीको स्राेत बनाउनका लागि कार्यक्रमले छनाेट गरेका लक्षित वर्गलाई स्याउ तथा ओखरका बिरुवा वितरण गरिएको हो ।
ताँजाकोट गाउँपालिकाका मुख्यमन्त्री रोजगार कार्यक्रमका सबइन्जिनीयर ध्रुवबहादुर शाहीले रोजगार कार्यक्रमकाे प्रभावकारिता त्यति नदेखिएपछि गाउँपालिकाको समन्वयमा फरक खाले कार्यक्रम सञ्चालन गर्ने निर्णयअनुसार फलफूलका बिरुवा वितरण गरेको बताउनुभयो ।
उहाँले गाउँपालिकाका पाँच वटै वडाबाट छनाेट भएका १४० जना सदस्यलाई एक हजार आठ सय स्याउ र ओखरका बिरुवा वितरण गरेको बताउनुभयो । छनाेट भएका सदस्यहरुले यसअघि बिरुवा लगाउने क्षेत्रमा घेरबार गर्ने कार्य र खाल्डो खन्ने काम सम्पन्न गरेपछि बिरुवा वितरण गरिएको छ ।
छनाेट भएका सदस्यहरुलाई घेरबार र खाल्डो खनेको ज्याला दिइएको छ । यसका लागि बीस लाख बजेटको व्यवस्था गरिएको थियो । ती बिरुवा गाउँपालिकाकै किसानले नर्सरीमा उत्पादन गरेको बिरुवा खरिद गरेर वितरण गरिएको छ ।
