फोर्टिन स्टार कप पुसमा

काठमाडौँ, मङ्सिर २६ गते । गुल्मीको स्टार युवा क्लबको आयोजनामा पुस ७ देखि १० गतेसम्म माध्यमिक विद्यालयस्तरीय फुटबल प्रतियोगिता हुने भएको छ । क्लबको १३औँ वार्षिकोत्सवको आयोजनामा सञ्चालन हुन लागेको ‘चौथो फोर्टिन स्टार कप–२०८०’ प्रतियोगितामा कक्षा ९ र १० का विद्यार्थी खेलाडीको सहभागिता रहने आयोजकले जनाएको छ ।

प्रतियोगिताका खेलहरू गुल्मी सदरमुकाम तम्घासको चिदिचौरमा हुने क्लबका अध्यक्ष विक्रमसिंह बुढाथोकीले जानकारी दिनुभयो । प्रतियोगिताको विजेता टोलीलाई ३५ हजार र उपविजेतालाई २५ हजार रुपियाँसहित ट्रफी, पदक र प्रमाणपत्र प्रदान गरिनेछ ।

प्रतियोगितामा सहभागी खेलाडीलाई प्राथमिक उपचार र एक लाख रुपियाँ बराबरको म्यादी बीमासमेत गरिने आयोजक क्लबका महासचिव नारायण आचार्यले जानकारी दिनुभयो ।