म च्यातिदिन्छु किताबका यी पानाहरू
जसले दिन्छ झुटो बयान
इतिहास निर्माणको ।
आक्रमण, युद्ध, हत्या, छलकपट र षड्यन्त्र
रातै रगतले रङ्गिएका हातहरू
मन सिरिङ्ग हुने घटनाक्रमहरू
घिन लाग्दा काण्डहरू
कठघरामा उभ्याउन लायकका
दोषी अपराधीहरू प्रमाणित हुन्छन् ।
इतिहासलाई बङ्ग्याई टिङ्ग्याई गरिन्छ
कुकृत्यहरूले
नृप, राजा, महाराजाहरूका क्रुरताले
युद्ध सरदारहरूका पाषाण हृदयले
भूगोल खुम्चिन्छ सीमाहरू
कर्तुतहरूले
घातक हतियारका प्रहारले ।
लुकाएर लुकाउन सकिँदैन फाइलभित्र
हत्यारा हातहरू
अपराधका प्रमाणहरू
उदाङ्गिछन् ऐनामा झैँ छर्लङ्ग
कुकृत्यका विम्बहरू
दिउँसैका बलत्कारहरू ।
इतिहासमा आँधी झैँ उठून्
आन्दोलनहरू
क्रुरतापूर्वक बढारेर लैजाऊन्
घृणित कार्यहरू
कार्यका अवशेषहरू
सिर्जित गरून् नव विम्बहरू ।
