काठमाडौँ, असोज २४ गते । चलचित्र ‘पशुपति प्रसाद–२ भस्मे डन’ को ट्रेलर सार्वजनिक गरिएको छ । ट्रेलरमा भस्मे डनको भूमिकामा अभिनेता विपिन कार्की देखिनुभएको छ भने नायिका स्वस्तिमा खड्का र अर्का दुई नायक सौगात मल्ल र रवीन्द्रसिंह बानियाँ पनि ट्रेलरमा अटाउनुभएको छ ।
ट्रेलरमा प्रेम र बदलाको कथा पाइन्छ । चलचित्रले ‘पशुपति प्रसाद’ को मृत्यु भएपछि पशुपति क्षेत्रमा आफ्नो अस्तित्व स्थापित गर्न सङ्घर्षरत ‘भस्मे डन’ को जीवनलाई रोमाञ्चक तरिकाले चलचित्रमा देखाउन खोजिएको छ । विपिन कार्की, सौगात मल्ल, स्वस्तिमा खड्का, रवीन्द्रसिंह बानियाँ, माओत्से गुरुङ, प्रकाश घिमिरे, लोकेन्द्र लेखक, सजन थापामगरलगायत कलाकारको चलचित्रमा अभिनय रहेको छ ।
चलचित्रमा अभिनेता तथा निर्माता खगेन्द्र लामिछाने र अभिनेतृ वर्षा सिवाकोटी विशेष भूमिकामा देखिनुभएको छ । टुकी आर्ट्सको ब्यानरमा निर्माण भएको चलचित्रलाई खगेन्द्र लामिछानेले लेख्नुभएको तथा निर्माण गर्नुभएको हो ।
