काठमाडौँ, असोज १८ गते । कुमार भाष्करको निर्देशनमा बनेको चलचित्र ‘कौसिद’ मा समावेश गीत सार्वजनिक भएको छ । बुधबार सार्वजनिक ‘नझर्थेर आँसु...’ बोलको गीत मार्मिक सुनिन्छ ।
गीतले सुखदुःख मिश्रित दैनिकीको भाव बोल्छ । आफ्नो पीडा भुलेर अरूको खुसीका लागि सङ्घर्षरत एक शिक्षकको कथा शब्दमा व्यक्त गरिएको छ । गीतमा स्वर र सङ्गीत पहिलो नेपाल आइडल बुद्ध लामाको छ । शब्द लक्ष्मण बानियाँले लेख्नुभएको हो । मिक्सिङ तथा मास्टरिङ राहुल प्रधानको छ ।
असोज २६ बाट प्रदर्शनमा आउने चलचित्रले पोस्टर रिलिजबाटै चर्चा कमाएको थियो । यसअघि सार्वजनिक ट्रेलरलाई दर्शकले सकारात्मक प्रतिक्रिया दिएका छन् । अभिनेता भोलाराज सापकोटा र अभिनेत्री ऋचा शर्मा चलचित्रका प्रमुख कलाकार हुन् ।
चलचित्रमा ऋचा र भोलाराजसँगै रूपेश दाहाल, परीक्षितविक्रम राणा, सदीक्षा गौतम, निर्भीक भट्टराई र सन्दीप लोहनी मुख्य भूमिकामा छन् । केदार भुसालको निर्माणमा तयार भएको यो फिल्मको कार्यकारी निर्माता दिमेश श्रेष्ठ र सहनिर्माता लक्ष्मण बानियाँ हुनुहुन्छ । चलचित्रको कथा लेखन नवविजय प्रकाश श्रेष्ठ र धिर्जन थपलियाले गर्नुभएको छ । निसाल पौडेलले छायाङ्कन गर्नुभएको चलचित्रमा भीम विश्वकर्माको सम्पादन छ ।
