काठमाडौँ , असोज १८ गते । यही असोज २६ देखि प्रदर्शनमा आउने चलचित्र ‘परदेशी–२’ को नयाँ गीत सार्वजनिक गरिएको छ । चलचित्रमा समावेश ‘कुरा सिधा छ’ बोलको डान्सिङ शैलीको गीत बुधबार सार्वजनिक गरिएको हो । गीतमा चलचित्रका मुख्य कलाकार अभिनेता प्रकाश सपुत र अभिनेतृ वर्षा शिवाकोटी प्रस्तुत छन् ।
प्रताप दास र मीना निरौलाको स्वर रहेको गीतमा बिबी अनुरागीको शब्द तथा सङ्गीत छ । गोविन्द राईले भिडियोको कोरियोग्राफी गरेका हुन् । ‘लिरिकल शैली’ मा तयार गीतको भिडियो सम्पादन भने मिराज अर्यालले गर्नुभएको छ ।
दसैँको छेको पारेर प्रदर्शनमा आउन लागेको ‘परदेशी–२’ लाई नारायण रायमाझीले निर्देशन गर्नुभएको हो । चलचित्रमा प्रकाश र वर्षासँगै केकी अधिकारी, प्रशान्त तामाङ, दिलीप रायमाझी, नीर शाह, रमा थपलिया, देवेन्द्र बब्लु, सबिन बास्तोला, रोशनी कार्कीलगायतको अभिनय छ । रमेश बिजीको कथा एवं पटकथा लेखन रहेको चलचित्र राजेश वंशल र निर्देशक रायमाझीले संयुक्त रूपमा निर्माण गर्नुभएको हो ।
