मुक्तक

१ 

गरेकी छु भरोसा खिन्न नहोस् मनमा

धोका र घातको चिह्न नहोस् मनमा 

मुटु छाम्दा हामीले पाऊँ  एकअर्कालाई

यो मायाको आकार भिन्न नहोस्  मनमा  

२

मुटुमा राखेर आँखाको कसिङ्गर नबनाऊ

उजाडी मलाई चैतको पतिङ्गर नबनाऊ

फेरेको हरेक सासमा तिम्रो मात्रै नाम छ

त्यही नामले तर्सिने घाइते अजिङ्गर नबनाऊ 

३

कसरी भन्नु कति माया लाग्छ भनेर

धड्किन्छ मुटु अति माया लाग्छ भनेर

प्रमाण केही हुन्न न त मिल्छ देखाउन

आकाश धर्ती जति माया लाग्छ भनेर 

४ 

तिमीले छल्यौ भने म रापले मर्छु 

टुटेको मन र त्यस्कै तापले मर्छु

जिउँदो पारी मलाई विष नदिनू

दुःखेको मुटु हारेको श्रापले मर्छु ।

५

अनुभूतिको सार लिएर बाँचेकी छु 

कल्पनामा  प्यार  दिएर  बाँचेकी छु 

रमेकी छु  यस्तो मायाको संसारमा

पर्खाइका आँसु पिएर बाँचेकी छु  ।