काठमाडौँ, भदौ १२ गते । उदय सुब्बाको निर्देशनमा निर्माण भएको चलचित्र ‘दुई कदम’ को पोस्टर सार्वजनिक गर्दै प्रदर्शन मिति घोषणा गरिएको छ । चलचित्रका दुई पोस्टरमा प्रदर्शन मिति मङ्सिर २९ उल्लेख गरिएको छ ।
चलचित्रको सार्वजनिक एक पोस्टरमा डेब्यु अभिनेता इओन लिम्बू र डेब्यु अभिनेतृ सिमोन गिरीलाई छाता ओढेर रोमान्टिक अवतारमा प्रस्तुत गरिएको छ । दोस्रो पोस्टरमा अभिनेता गौरव पहारी रिसाएर हातमा बन्दुक लिएर पड्काउँदा डेब्यु अभिनेतृ गिरी निकै डराएको हाउभाउमा देखिनुभएको छ ।
अजम्बरी फिल्मसको ब्यानरमा निर्माण भएको चलचित्रमा तारादेवी लिम्बूको लगानी रहेको छ । गौरव, इओन र सिमोनका अलवा सुनिल थापा, कविता आले, बुद्धि तामाङ, अर्जुन गुरुङ, विमला लिम्बू, जीवन लिम्बू, चन्दा दाहाल र प्रीतिका शर्माको चलचित्रमा अभिनय रहेको छ । चलचित्रको एक गीतमा अभिनेता विल्सन विक्रम राईले पनि विशेष भूमिका निर्वाह गर्नुभएको छ ।
मुस्ताङमा एक गीतको सुटिङ गरिएको चलचित्रको बाँकी छायाङ्कन पूर्वका धनकुटा, तेह्रथुमको वसन्तपुर, इलाम, झापा र धरानमा गरिएको हो । दयाराम घिमिरेको कथा तथा पटकथा लेखन, विक्रम डिसीको छायाङ्कन, ताराप्रकाश लिम्बू र विकास चौधरीको सङ्गीत, डिपी खनालको गीत लेखन, राजु किराँतीको द्वन्द्व निर्देशन, रामजी लामिछानेको कोरियोग्राफी र प्रवीन ढकालको सम्पादन चलचित्रमा रहेको छ ।
