काठमाडौं, असार १० गते । संस्कृति, पर्यटन तथा नागरिक उड्डयनमन्त्री सुदन किरातीले शनिबार बेलुकी चलचित्र ‘नीरफूल’ हेर्नुभयो । उहाँले सिभिल मलस्थित क्युएफएक्समा चलचित्रका निर्देशक फूलमान बल, अभिनेताद्वय दयाहाङ र बुद्धि तामाङसँगै चलचित्र हेर्नुभएको हो ।
“भूकम्पले समाजमा पारेको प्रभाव, मान्छेको सानो सपनाले दिएको ठुलो दुःख, चलचित्रले अनगिन्ती प्रश्न उठाएको छ । मुख्यतः सहर र गाउँबीचको सामाजिक, सांस्कृतिक सवाल बेजोडसँगले प्रस्तुत भएको रहेछ”, मन्त्री किरातीले सामाजिक सञ्जालमा उल्लेख गर्नुभएको छ । आफूले चलचित्रमार्फत दिन खोजेको सन्देशलाई मन्त्री किरातीले महसुस गर्नुभएको निर्देशक बलले बताउनुभयो ।
वि.सं. २०७२ को भूकम्पको सेरोफेरोमा कथा भनिएको चलचित्रले विपत्तिपछि धादिङस्थित रूबी भ्यालीको एक परिवारले भोग्नुपर्ने समस्या र बिछोडको दुर्दुरता पेस गर्छ । राज्य प्रणालीको कमजोर पक्षसमेत उजागर गरिएको चलचित्र गणेश हिमालमुनिको रबी भ्याली, रसुवा र काठमाडौँमा छायाङ्कन गरिएको निर्देशक बलले जानकारी दिनुभयो । चलचित्र गत जेठ २६ गतेदेखि प्रदर्शनरत छ । रासस
