काठमाडौँ, वैशाख २ गते । ओटीटी प्लेटफर्म सिनेमाघर एपमा नयाँ वर्षको अवसर पारेर चलचित्र ‘प्रेमगञ्ज’ रिलिज भएको छ। मोबाइल, ट्याब्लोइड एप तथा टेलिभिजनलगायत सम्पूर्ण स्मार्ट डिभाइसहरूमा विश्वभरबाट हेर्न सकिने गरी यो चलचित्र रिलिज भएको हो।
हलहरूमा भने चलचित्र गत भाद्र ३ गते रिलिज भएको थियो। परिच्छेद सेनले निर्देशन गर्नुभएको चलचित्रले हल रिलिजबाट समीक्षात्मक रूपमा प्रशंसा पाएको थियो। प्रेमकथामा आधारित चलचित्रले दुई कालखण्डको प्रेमकथा भन्छ। “जो जीवनमा छ, ऊ मनमा छैन। जो मनमा छ, ऊ जीवनमा छैन,” भन्ने ट्यागलाइनमा बसेर चलचित्रको कथा बुनिएको छ। चलचित्रमा तेज गिरी, बेनिशा हमाल, सम्पदा बानियाँ, राइडर प्रशान्त, सुप्रिया खनाल, सिम्रन खड्कालगायतको अभिनय रहेको छ। चलचित्र चौतारीले निर्माण गरेको चलचित्रको कार्यकारी निर्माता अनन्तमान श्रेष्ठ हो भने प्रस्तुतकर्ता राजु फुयाल हुनुहुन्छ।
