काठमाडौँ, मङ्सिर २४ गते । आव २०७८/७९ मा सुदूरपश्चिम प्रदेशको कुल गार्हस्थ्य उत्पादन उपभोक्ताको मूल्यमा करिब तीन खर्ब ३९ अर्ब हुने अनुमान गरिएको छ ।
केन्द्रीय तथ्याङ्क विभागका अनुसार सो आर्थिक वर्ष सुदूरपश्चिम प्रदेशको कुल गार्हस्थ्य उत्पादन (जिडिपी) एक वर्षमा करिब साढे ३८ अर्ब रुपियाँले बढेको हो । गत आर्थिक वर्षको संशोधित अनुमानअनुसार सुदूरपश्चिम प्रदेशको कुल गार्हस्थ्य उत्पादन तीन खर्ब एक अर्ब रुपियाँ रहेको थियो ।
राष्ट्रिय कुल गार्हस्थ्य उत्पादनमा सुदूरपश्चिमको हिस्सा भने परिवर्तन आउन सकेको छैन । अघिल्लो आर्थिक वर्ष राष्ट्रिय कुल गार्हस्थ्य उत्पादनमा यस प्रदेशले ७ प्रतिशत हिस्सा ओगटेको थियो भने आव २०७८/७९ मा पनि यस प्रदेशको योगदान ७ प्रतिशत नै हुने अनुमान गरिएको नेपाल राष्ट्र बैङ्कको सुदूरपश्चिम प्रदेशको प्रादेशिक आर्थिक गतिविधि अध्ययनमा उल्लेख छ ।
आव २०७८/७९ मा राष्ट्रिय कुल गार्हस्थ्य उत्पादन उपभोक्ताको मूल्यमा ४८ खर्ब ५२ अर्ब रुपियाँ हुने अनुमान गरिएकामा ३६.९ प्रतिशत योगदानसहित सबैभन्दा बढी बागमती प्रदेशको कुल गार्हस्थ्य उत्पादन १७ खर्ब ९१ अर्ब रुपियाँ हुने अनुमान गरिएको छ भने सबैभन्दा कम हिस्सा ४.१ प्रतिशतको योगदानसहित कर्णाली प्रदेशको करिब एक खर्ब ९८ अर्ब हुने अनुमान गरिएको छ ।
प्रादेशिक सम्भावना
सुदूरपश्चिम प्रदेशको कैलाली र कञ्चनपुर जिल्ला खाद्य सुरक्षामा आत्मनिर्भर भएकाले सो क्षेत्रमा कृषिको व्यवसायीकरण, आधुनिकीकरण र यान्त्रिकीकरण गरी उत्पादकत्व वृद्धि गरी समग्र प्रदेशको खाद्य सुरक्षालाई वृद्धि गर्न सकिने सम्भावना रहेको अध्ययनमा उल्लेख छ ।
साथै अन्य जिल्लामा खाद्य सुरक्षाका लागि कृषिको व्यवसायीकरण, आधुनिकीकरण र यान्त्रिकीकरण गरी उत्पादन र उत्पादकत्व वृद्धि गर्न सकिने सम्भावना पनि सो क्षत्रमा रहेको छ ।
प्रदेशका निर्माणाधीन विभिन्न जलविद्युत् आयोजनाको निर्माण द्रुत गतिमा सम्पन्न भएमा विद्युतीय पहुँच अभिवृद्धि भई विद्युत्मा आधारित उद्योग विस्तार गर्न सकिने सम्भावना रहेको सो क्षेत्रमा वैकल्पिक ऊर्जा (सौर्य ऊर्जा, बायोग्यास आदि)को प्रवर्द्धन, विकास र विस्तार गर्न सकिने सम्भावना पनि रहेको सो अध्ययनमा उल्लेख छ ।
