रमेश पौडेल
पोखरा, असोज १२ गते ।‘पर्यटनका लागि पुनर्विचार गरौँ’ भन्ने नाराका साथ ४३औँ विश्व पर्यटन दिवस पोखरा सहरमा विविध कार्यक्रम आयोजना गरी मनाइएको छ । यो दिवसको अवसर पारेर पर्यटकलाई स्वागत सत्कारदेखि लेकसाइड मिनी सडक महोत्सव, अन्तर्राष्ट्रिय विमानस्थलसम्बन्धी अन्तक्र्रिया र हाइकिङसम्मका कार्यक्रम आयोजना गरिएका छन् ।
पोखरा विमानस्थलमा मङ्गलबार बिहानको पहिलो उडानमार्फत एवं स्थलमार्गबाट पोखरा प्रवेश गर्ने पर्यटकलाई पर्यटन बसपार्कमा पञ्चेबाजा र झाँकीसहित स्वागत सत्कार गरिएको छ ।
पोखराको पर्यटन व्यवसायी, गण्डकी प्रदेश उद्योग, वाणिज्य तथा आपूर्ति मन्त्रालय, नेपाल पर्यटन बोर्ड र पोखरा पर्यटन परिषद्को संयुक्त आयोजनामा पर्यटकको स्वागत सत्कार गरिएको हो । सो अवसरमा गण्डकी प्रदेशका शिक्षा, संस्कृति, विज्ञान प्रविधि तथा सामाजिक विकासमन्त्री मेखलाल श्रेष्ठ, पर्यटन बोर्ड गण्डकी प्रदेशका प्रमुख काशीराज भण्डारी र पोखरा पर्यटन परिषद्का अध्यक्ष पोमनारायण श्रेष्ठलगायत पर्यटन व्यवसायसँग सम्बद्ध सङ्घ, संस्थाका प्रमुख तथा प्रतिनिधिहरूको उपस्थिति थियो ।
पोखरा पर्यटन परिषद् अध्यक्ष श्रेष्ठले विमानबाट पोखरा आएका भारतीय पर्यटक भारती पाण्डे, स्पेनका नागरिक इर्न अर्टिज रोबियो र स्पेनकै जेन्से कार्कोसलाई खादा र प्रमाणपत्रसहित स्वागत गर्नुभयो । उहाँहरू तीनै जनासहित पहिलो उडानमार्फत पोखरा भित्रिएका पर्यटकका लागि विभिन्न प्याकेजमा छुटको व्यवस्था गरिएको अध्यक्ष श्रेष्ठले बताउनुभयो । यसैबीच गण्डकी प्रदेश पर्यटन मन्त्रालयले ‘अन्तर्राष्ट्रिय विमानस्थल र विश्व पर्यटन बजार’ विषयक अन्तत्र्रिmया कार्यक्रमको आयोजना गरेको छ । त्यस अवसरमा भौतिक पूर्वाधारमन्त्री कुमार खड्काले पोखरा विमानस्थल सञ्चालनका लागि प्रदेश सरकार निरन्तर लागिपरेको बताउनुभयो ।
पर्यटनमन्त्री मणिभद्र शर्माले विमानस्थलका लागि आवश्यक भौतिक निर्माणको काम अन्तिम चरणमा पुगेको र निर्धारित मिति पुस १७ गतेमै सञ्चालन गरिने बताउनुभयो । उहाँले पोखरा विमानस्थललाई विश्व बजारमा प्रचार गर्न आवश्यक रहेकाले सोहीअनुसारको ‘मार्केट’ आवश्यक पर्ने र त्यसका लागि मन्त्रालय लागिपरेको बताउनुभयो ।
प्रदेशका शिक्षामन्त्री मेखलाल श्रेष्ठले पोखरा साहसिक खेलकुद तथा पदयात्राका लागि महìवपूर्ण गन्तव्यस्थल रहेकाले यसको अन्तर्राष्ट्रिय क्षेत्रमा नै उचित प्रचारप्रसार आवश्यक रहेको बताउनुभयो । पोखरा महानगरपालिकाका प्रमुख धनराज आचार्यले विमानस्थल सञ्चालनका लागि ल्यान्डफिल साइट स्थानान्तरण छिटै हुने आश्वासन दिनुभयो ।
त्यस अवसरमा विभिन्न अन्तर्राष्ट्रिय एयरलायन्सका प्रतिनिधिले पोखरा अन्तर्राष्ट्रिय विमानस्थलको अवलोकन गर्नुभएको थियो । नेपाल सरकारले आवश्यक पूर्वाधार निर्माण गरेमा सो विमानस्थलमा उडान सञ्चालन गर्न सकिने सुझाव दिएका थिए । त्यस्तै पर्यटन दिवसकै अवसरमा टे«किङ एजेन्सी एसोसिएसन नेपाल (टान) गण्डकीले एक दिने हाइकिङ कार्यक्रम गरेको छ । पोखरा–१३ को काहुँखोलाबाट सुरुभएको हाइकिङ भञ्ज्याङ, चिप्लेंटी, महाप्रभुधाम, मणिदीप र कसेरीसम्म गरिएको टानका अध्यक्ष सुशीलराज पौडेलले बताउनुभयो । रेस्टुरेन्ट व्यवसायीको छाता सङ्गठन रेवान पोखराले पनि मिनी सडक महोत्सवको आयोजना गरेको छ । सो महोत्सवमा विभिन्न खानाका परिकारसहित सांस्कृतिक कार्यक्रमसमेत रहेको थियो ।
महोत्सवमा स्वदेशी र विदेशी खानाका परिकार, विभिन्न जातजातिका सांस्कृतिक नृत्य, गन्धर्व गायन, नेवारी लाखे नाच, पञ्चेबाजा र पर्यटनसम्बन्धी वृत्तचित्र प्रदर्शन गरिएको रेवान उपाध्यक्ष विश्वराज पौडेलले जानकारी दिनुभयो । नेपाल घुम्न आउने पर्यटकमध्ये ४० प्रतिशत पर्यटक अन्नपूर्ण पदयात्रासँगै पोखरा क्षेत्रमा घुम्न आउने तथ्याङ्क रहेको पर्यटन बोर्ड गण्डकी प्रदेशका प्रमुख काशी भण्डारीले जानकारी दिनुभयो । सरकारले कोरोना महामारीपछि नेपालको पर्यटन क्षेत्रलाई पुनरुत्थान गर्ने गरी पर्यटन क्षेत्रको विकास र विस्तार गर्न पूर्वाधार निर्माण, यस क्षेत्रका उद्योगी व्यवसायीका लागि विभिन्न राहत तथा छुट सुविधा प्रदान गरिने बताइएको छ ।
प्रदेश संस्कृति, पर्यटन तथा नागरिक उड्डयन मन्त्रालयका अनुसार पर्यटन प्रवद्र्धनात्मक कार्यक्रम अगाडि बढाएको छ । सरकारले हालै नेपालको पर्यटन क्षेत्र पुनरुत्थान कार्ययोजना, २०७९ ल्याएको छ । यसले नेपालको पर्यटन क्षेत्र पुनरुत्थान गर्न विभिन्न कार्यक्रम अगाडि बढाएको जनाइएको छ । सो कार्ययोजनाअन्तर्गत सन् २०२३ देखि २०३२ लाई नेपाल भ्रमण दशक मनाउने घोषणा गरिएको छ ।
