काठमाडौं, साउन १८ गते । लिग चरणको अन्तिम खेलमा आयोजक भारतले माल्दिभ्सलाई हराएपछि नेपाल साफ यू–२० च्याम्पियनसिप फुटबलबाट बाहिरिएको छ । भुवनेश्वरस्थित कालिंगा रंगशालामा मंगलबार राति भएको खेलमा भारतले माल्दिभ्सलाई १–० गोलले हरायो ।
भारतको जितमा गुर्किरात सिंहले खेलको अन्तिम समयमा निर्णायक गोल गर्नुभएको थियो । यसअघि बंगलादेशलाई १–१ गोलको बराबरीमा रोक्दै फाइनल पुग्ने झिनो आशा राखेको नेपाल भारतको जितसँगै बाहिरिएको हो । यदि माल्दिभ्सले भारतलाई हराएको भए नेपाल फाइनलमा पुग्ने थियो ।
उपाधि जित्ने लक्ष्यका साथ भारत गएको नेपाली युवा टोलीका लागि लिग चरणको तेस्रो खेलमा भारतसँग ८–० गोलको हार खेल्नुनै महंगो भयो । नेपालले तेस्रो स्थानमा चित्त बुझायो । फाइनलमा भारत र बंगलादेशबीच शुक्रबार प्रतिस्पर्धा हुनेछ । श्रीलंका र माल्दिभ्स पनि बाहिरिएका छन् ।
