घोराहीमा आइतबार पनि सामुदायिक विद्यालय सञ्चालन गर्ने निर्णय

सन्तोष दहित

दाङ, वैशाख २३ गते ।घोराही उपमहानगरपालिकाको कार्यपालिकाको बैठकले विद्यार्थीको पठनपाठनलाई मध्यनजर गर्दै आइतबार पनि सामुदायिक विद्यालय सञ्चालन गर्ने निर्णय गरेको छ ।

यस अघि सङ्घीय सरकारले आइतबार पनि विद्यालय बन्द गर्ने निर्णय गरेको थियो । तर, पालिकाले विद्यार्थीको हितमा भन्दै विद्यालय खोल्ने निर्णय गरेको हो ।

सोही अनुसार निर्णय कार्यान्वयन गर्न घोराहीका सामुदायिक विद्यालयका प्रधानाध्यापकलाई बोलाएर अर्को व्यवस्था नभएसम्मका लागि आइतबार पनि विद्यालय खोल्ने निर्णय भएको मेयर नरुलाल चौधरीले जानकारी दिनुभयो ।

उहाँले निजी विद्यालय आइतबार पनि यसअघि नै सञ्चालन भइरहेकाले सामुदायिक विद्यालयमा पनि आइतबार पढाउने अभिभावक र पढ्ने विद्यार्थीको हितमा निर्णय गरिएको पनि बताउनुभयो ।

बर्खे बिदा र आइतबारको बिदा कसरी समायोजन गर्ने भन्ने बारे निर्णय हुन बाकी रहेकाले अर्को ब्यवस्था नभएसम्म आइतबार विद्यालय खोल्ने कार्यपालिकाले निर्णय गरेको उहाँले जानकारी दिनुभयो ।

सामुदायिक विद्यालयका प्रधानाध्यापकले उपमहानगरले बोलाएको बैठकमा निजी विद्यालय आइतबार सञ्चालन हुने अवस्थामा आफूले सामुदायिक विद्यालय आइतबार बन्द गर्न नसक्ने बताएका थिए ।

निजी विद्यालय आइतबार बन्द हुने अवस्थामा सामुदायिक विद्यालय पनि आइतबार बन्द गर्न सकिने प्रअले बैठकमा सुझाव दिएकाथिए ।

गोरखापत्र अनलाइन