गोविन्द शर्मा
बाँके, चैत २३ गते । नेपालगञ्ज–गुलरिया सडक खण्डअन्तर्गत खजुरा र जानकी गाउँपालिकाको सीमास्थित किरण नालामा थप पुल निर्माण सुरु भएको छ ।
चार लेनको सडक रहेकोमा यसअघिको पुल दुई लेनको मात्र भएकाले सडक बिस्तारसँगै पुल पनि थप गरिएको हुलाकी राजमार्ग निर्देशनालय योजना कार्यालय नेपालगञ्जका योजना प्रमुख लिलाबहादुर भण्डारीले जानकारी दिनुभयो ।
भण्डारीले भन्नुभयो, ‘सो स्थानमा सवारी दुर्घटनाका घटना बढ्न थालेपछि नयाँ पुल निर्माण कार्य अघि बढाइएको हो । दुईवटा पुल भएपछि चार लेन सडकमा सवारी आवागमनमा थप सहजता हुनेछ ।’
करिब चार करोड ५० लाखको लागतमा पुल निर्माण कार्य सुरु भएको हो । हाल धमाधम जग निर्माणको काम भइरहेको छ । केही बर्षअघि मात्र निर्माण भएको दुई लेन सवारी सञ्चालन हुने पुल साँघुरो भएपछि सोही स्थानमा दुई लेनको अर्को पुल निर्माण सुरु गरिएको छ ।
पुरानो दुई लेनको पुल यथावत राखेर नयाँ थप दुई लेनको पुल बनाउन लागिएको छ । आगामी असारभित्रै पुल निर्माण सक्नेगरि काम भइरहेको हुलाकी राजमार्ग निर्देशनालय योजना कार्यालय नेपालगञ्जले जनाएको छ ।
यसैगरी बर्दियाको बढैयाताल गाउँपालिकामा पर्ने चपला नालामा रहेको पुल पनि चार लेनको बनाइने योजना कार्यालयले जनाएको छ ।
