गोरखापत्र समाचारदाता
काठमाडौँ, चैत २२ गते । छन्दकवि दिव्यलक्ष्मी पोखरेलको काव्यकृति मातृ वन्दनामाथि राजधानीमा शनिबार परिचर्चा गरिएको छ । नागार्जुन वाङ्मय प्रतिष्ठानद्वारा आयोजित मासिक सुप्रभात काव्य गोष्ठीमा समालोचक ढुण्डिराज पहाडीले सुनकोशीको प्रवाह जस्तै दिव्यलक्ष्मीको काव्यमा भोगाइ र अनुभूतिको प्रवाह रहेको चर्चा गर्नुभयो ।
समालोचक पहाडीले भन्नुभयो, “दिव्यलक्ष्मी गमलामा फुलाएको फूल होइन, पहरामा फुल्ने सुनगाभा जस्तो लाग्छ । ‘मातृ वन्दना’ नित्यनवीन विषय भए पनि छुट्टै कलाशैली छ । लेखनमा अनुभूतिको प्रवाह छ । सरल विम्ब, सरस तर गहन छन् । सरलताभित्र गहनता काव्यको विशिष्टता हो ।” कवि प्रोल्लास सिन्धुलीयले सहरको विद्यालय, मेरी छोरी धेरैको श्राप लिएर जन्मिन्छेलगायत छ वटा कविता वाचन गर्नुभएको थियो ।
गोष्ठीका समालोचक प्राडा खडानन्द पौड्यालले कवि प्रोल्लासलाई ‘युगको कोशेढुङ्गो’ विशेषण दिँदै उहाँका कवितामा परम्परालाई जोड्दै भविश्यलाई गाँस्दै गएको चर्चा गर्नुभयो । कवि पोखरेलले निरक्षर भए पनि रेखा कोरेर तिनमा अर्थ र भाव पोख्दै साहित्य लेखनमा आएको स्मरण गर्नुभयो ।
गोष्ठीमा लक्ष्मण अधिकारी, सरोज पहाडी, दिलकुमारी डङ्गोल, आल्फी फोयन फाक्लुपा, पदम दाहाल, चेवन बस्नेत ठुलाघरे, बुद्धिसागर पौड्याल, बलराम विष्टलगायतले कविता (गद्य, पद्य), गजल, मुक्तक वाचन गर्नुभएको थियो ।
