बेइजिङ, साउन ६ गते । चीनको अन्तर्राष्ट्रिय विकास सहयोग नियोग (सिआइडिसीए) का प्रमुख लुओ झाओहुईले हालै केही अमेरिकी अधिकारीहरूले आफ्नो मुलुकको वैदेशिक सहायता नीतिलाई लिएर गरेको भ्रामक भनाइको खण्डन गर्नुभएको छ ।
सिआइडिसीए र वाणिज्य मन्त्रालयको संयुक्त आयोजनामा बिहीबार भएको भ्रष्टाचार विरोधी मञ्चमा उहाँले चीनको वैदेशिक सहायता नीतिलाई बदनाम गर्न खोजेको अमेरिकी प्रयासको निन्दा गर्नुभएको हो ।
बितेका ७३ वर्षमा चीनले सधैं विदेशी सहायतालाई ठूलो महत्त्व दिएको र त्यसको प्रतिफल पनि सम्बद्ध देशले पाएका बताउँदै अमेरिकाले व्यक्तिगत लाभ लिन र आन्तरिक मामिलामा खुलेर हस्तक्षेप गर्न सहायताको ‘खाली चेक’ लेख्ने गरेको टिप्पणी गरे । उहाँले संयुक्त राज्य अमेरिकाको कमजोर विदेशी सहायताको अभिलेख पनि प्रस्तुत गर्नुभयो । अमेरिका आफ्नो स्वार्थलाई अगाडि बढाउन र अन्य देशको आन्तरिक मामिलामा खुलेर हस्तक्षेप गर्न सहयोगका साधन प्रयोग गर्नबाट कहिल्यै पछि नपरेको आरोप पनि लगाउनुभयो ।
चीनको वैदेशिक सहायता नीतिले विश्वको साझा विकासलाई प्रवर्द्धन गर्न तथा विकासोन्मुख देशका जनताको आर्थिक, सामाजिक र जीवनस्तरमा सुधार गर्न महत्वपूर्ण योगदान गरेको दाबी लुओले गर्नुभयो । कोरोनाको महामारीका कारण उत्पन्न विश्वव्यापी आर्थिक मन्दी र त्यसको पुनरुत्थानका अवरोधबाट पार पाउन तथा खाद्य सङ्कटलगायत कठिनाइबाट मुक्ति पाउन सबै देशले मिलेर काम गर्नुपर्नेमा उहाँको जोड छ ।
