हिमाली क्षेत्रमा नक्कली उद्धार : थप दुई जना पक्राउ

काठमाडौँ, फागुन १३ गते । नेपालको उच्च हिमाली क्षेत्रमा पदयात्राका क्रममा रहेका विदेशी पर्यटकहरूको नक्कली उद्धार (फेक रेस्क्यू) गरी बिमा रकम ठगी गर्ने कार्यमा संलग्न थप दुई जनालाई प्रहरीले पक्राउ गरेको छ । 

नेपाल प्रहरीको केन्द्रीय अनुसन्धान ब्युरो (सिआइबी) ले पर्वतारोहण र ट्रेकिङ क्षेत्रमा हुने यस्ता गैरकानुनी क्रियाकलापमा संलग्न ट्रेकिङ कम्पनी तथा उड्डयन क्षेत्रका व्यक्तिहरूलाई नियन्त्रणमा लिएको हो ।

हिमाली क्षेत्रमा पर्यटकलाई स्वास्थ्य समस्या वा प्राकृतिक विपद् पर्दा गरिने उद्धारको बाध्यात्मक स्थितिको फाइदा उठाउँदै माउन्टेन रेस्क्यू सर्भिस, एभरेस्ट एक्सपेरियन्स एन्ड असिस्टेन्स र नेपाल चार्टर सर्भिसलगायतका कम्पनीले किर्ते कागजात तयार गर्ने गरेको प्रहरीको दाबी छ । 

यी कम्पनीहरूले संस्कृति, पर्यटन तथा नागरिक उड्डयन मन्त्रालय र नागरिक उड्डयन प्राधिकरणको अभिलेखमा रहेको 'प्यासेन्जर एन्ड कार्गो म्यानिफेस्ट' को विवरण थपघट गरी नक्कली बिल (इन्भ्वाइस) बनाउने गरेका छन् ।

त्यस्तै, उद्धार गरिएका पर्यटकहरूलाई काठमाडौँका विभिन्न अस्पतालमा भर्ना गरेको देखाई नक्कली मेडिकल रिपोर्ट र भर्ना तथा डिस्चार्ज रिपोर्ट तयार गरी बिमा रकम दाबी गर्ने गरिएको पाइएको छ । यस्ता क्रियाकलापले अन्तर्राष्ट्रिय सञ्चार माध्यममा नेपालको छवि बिग्रिएको र राष्ट्रिय स्वाभिमानमा आँच पुगेको सिआइबीको ठहर छ ।

पक्राउ पर्नेमा धादिङ ज्वालामुखी गाउँपालिका-२ घर भई ठमेलस्थित रोयल होलिडेज एडभेन्चर एन्ड ट्राभल कम्पनीमा कार्यरत २८ वर्षीय सन्दीप तिवारी र विमान सेवा सञ्चालक सङ्घ नेपाल (एओएएन) का पूर्व उपाध्यक्ष ५६ वर्षीय राजेन्द्रबहादुर सिंह रहेका छन् । सिंहलाई फागुन १३ गते र तिवारीलाई फागुन १२ गते पक्राउ गरिएको हो ।

मुलुकी अपराध संहिता, २०७४ को दफा ५१ अनुसार राष्ट्रहित प्रतिकूल काम गरेको र सङ्गठित अपराध निवारण ऐन, २०७० अन्तर्गतको कसूरमा उनीहरूमाथि अनुसन्धान भइरहेको छ । यस प्रकरणमा हालसम्म ट्रेकिङ कम्पनी, अस्पताल, बिमा एजेन्ट र हेलिकाेप्टर कम्पनीका सञ्चालक गरी जम्मा ९ जना पक्राउ परिसकेका छन् । 

काठमाडौँ जिल्ला अदालतबाट अनुमति लिई उनीहरूमाथि थप अनुसन्धान भइरहेको ब्युरोका प्रवक्ता एवं प्रहरी वरिष्ठ उपरीक्षक शिवकुमार श्रेष्ठले जानकारी दिनुभयो ।