संयुक्त राष्ट्रसङ्घमा इरान सम्बन्धी बैठक, अमेरिका र इरानका धारणा प्रस्तुत

संयुक्त राष्ट्रसङ्घ, माघ २ गते । पछिल्ला घटनाक्रमका बिच संयुक्त राज्य अमेरिका र इरानका प्रतिनिधि बिहीबार संयुक्त राष्ट्रसङ्घ सुरक्षा परिषदको आपतकालीन बैठकमा सहभागी भएका छन् । बैठकमा इरानमा देखिएको अवस्थाबारे गम्भीर चासो व्यक्त गर्दै अमेरिकी पक्षले आवश्यक सबै विकल्प विचाराधीन रहेको जनाएको छ ।

संयुक्त राष्ट्रसङ्घका लागि अमेरिकी राजदूत माइक वाल्ट्जले परिषदलाई सम्बोधन गर्दै राष्ट्रपति डोनाल्ड ट्रम्प परिस्थितिको नजिकबाट मूल्याङ्कन गरिरहेको र नागरिक सुरक्षालाई प्राथमिकतामा राख्दै उपयुक्त कदम चाल्ने तयारीमा रहेको बताउनुभयो । उहाँले इरानमा देखिएको हिंसा रोक्न अन्तर्राष्ट्रिय समुदायको साझा प्रयास आवश्यक रहेकोमा जोड दिनुभयो ।

मानवअधिकार सम्बन्धी संस्थाका अनुसार हालैका प्रदर्शनका क्रममा ठूलो सङ्ख्यामा मानवीय क्षति भएको बताइएको छ । यद्यपि इरान सरकारले आधिकारिक विवरण सार्वजनिक नगरेकाले यथार्थ अवस्था अझै स्पष्ट हुन सकेको छैन । हाल प्रदर्शन कम हुँदै गएको देखिए पनि सुरक्षा सम्बन्धी व्यवस्था र सञ्चार सीमितता यथावत रहेको जनाइएको छ ।

बैठकमा इरानका उपराजदूत होसेन दरजीले आफ्नो धारणा प्रस्तुत गर्दै आन्तरिक घटना क्रममा बाह्य हस्तक्षेप भएको आरोप अस्वीकार गरे र अन्तर्राष्ट्रिय समुदायलाई इरानको सार्वभौमिकताको सम्मान गर्न आग्रह गर्नुभयो । यस अवसरमा इरानी नागरिक अधिकारका पक्षधर मसीह अलिनेजाद र अहमद बतेबीले पनि परिषदमा आफ्ना अनुभव साझा गर्दै मानवअधिकारको संरक्षणका लागि थप अन्तर्राष्ट्रिय ध्यान आवश्यक रहेको बताउनुभयो ।

यसैबिच, क्षेत्रीय मुलुकले सम्भावित सैन्य कदमले मध्यपूर्व क्षेत्रको स्थायित्व र विश्व अर्थतन्त्रमा प्रभाव पार्न सक्ने भन्दै संयमता अपनाउन आग्रह गरेका छन् । यता, संयुक्त राज्य अमेरिकाले मानवअधिकार उल्लङ्घनसँग सम्बन्धित आरोपमा केही इरानी अधिकारीमाथि लक्षित प्रतिबन्ध घोषणा गरेको छ । विश्लेषकका अनुसार हाल इरानको अवस्था केही शान्त देखिए पनि कूटनीतिक संवाद र अन्तर्राष्ट्रिय समन्वय अझै महत्वपूर्ण बनेको छ । रासस/एपी