नवीनराज कुइँकेल
लमजुङ, पुस ९ गते । जेनजी आन्दोलनको मौका छोपेर कास्की कारागारबाट फरार एक जना थुनुवा लमजुङबाट पक्राउ परेका छन् । कर्तव्य ज्यानको कसुरमा कास्की कारागारमा रहेका लमजुङको दूधपोखरी गाउँपालिका–५, कोल्कीका ४५ वर्षीय मनबहादुर गुरुङलाई प्रहरीले पक्राउ गरेको हो । उनी गत भदौ २४ गते फरार भएका थिए ।
उनलाई प्रहरी चौकी गौंडाबाट खटिएको प्रहरी टोलीले मङ्गलबार नियन्त्रणमा लिई कानुनी प्रक्रियापछि कास्की कारागारमा बुझाइएको जिल्ला प्रहरी कार्यालय लमजुङका प्रमुख प्रहरी नायब उपरीक्षक रेशम बोहोराले जानकारी दिनुभयो ।
जिल्ला प्रहरी कार्यालय लमजुङका अनुसार भदौ २४ गते कास्की र तनहुँ कारागारबाट फरार भएका कैदी तथा थुनुवामध्ये हालसम्म लमजुङबाट ४६ जनालाई पक्राउ गरी सम्बन्धित कारागारमा बुझाइसकिएको छ ।
गत असार ३२ गते लमजुङ कारागारको गेट नजिकको पर्खाल भत्किएर सुरक्षा जोखिम बढेपछि लमजुङ कारागारमा रहेका १०९ जना कैदी तथा थुनुवालाई कास्की र तनहुँ कारागारमा स्थानान्तरण गरिएको थियो ।
जिल्ला प्रहरी कार्यालय लमजुङले फरार प्रतिवादीबारे सूचना भएमा नजिकको प्रहरी कार्यालयमा जानकारी गराइदिन आग्रह गरेको छ । प्राप्त सूचनाको गोपनीयता कायम राखिने प्रहरीले स्पष्ट पारेको छ ।
